✅Чингэлтэй дүүргийн 1-24 дүгээр хороодын Засаг дарга нарын ээлжит шуурхай хурал өнөөдөр буюу 10 дугаар сарын 22-ны өдөр болж дүүргийн Засаг дарга Б.Мөнхбат удирдан явуулав.

Уг шуурхайгаар эрүүл мэндийн чиглэлээр хийгдэж буй хөрөнгө оруулалт, бүтээн байгуулалтын ажлуудад анхаарч ажиллах, дүүргийн 1-24 дүгээр хороодын ахмадуудад зориулсан “Ахмадын хөгжлийн төв”-үүдийн байрыг засварлан тохижилтын ажлыг хийж гүйцэтгэх, Хороодын гудамж, зам талбайн тохижилтын ажлуудыг хийж буй гүйцэтгэгч компаниудад хяналт тавьж яаралтай дуусгаж ажиллахыг холбогдох албаныханд үүрэг болголоо.

Мөн дүүргийн Засаг даргын Тамгын газрын дарга Ж.Лхагвасүрэн цэрэг татлагын ажлыг үргэлжлүүлэх тухай Нийслэлийн Засаг даргын захирамжийг танилцуулж, цаг үеийн холбогдолтой мэдээлэл өглөө.

Нийслэлийн Чингэлтэй дүүргийн Ерөнхий боловсролын сургуулиудын дуу хөгжмийн хичээлийн сургалтыг чанаржуулж, өсвөр үеийнхэнд урлаг, уран сайхны боловсрол олгох, гоо зүйн хүмүүжлийг төлөвшүүлэх, авьяас чадварыг нээн хөгжүүлэх зорилгоор Д.Лувсаншаравын нэрэмжит “Хүүхдийн найрал дууны-Улсын уралдаант наадам”-ын анхан шатны шалгаруулалтыг өнөөдөр зохион байгууллаа.

Наадмын анхан шатны шалгаруулалтад дүүргийн 9 сургуулийн 500 гаруй авьяаслаг хүүхэд багачууд хамрагдсан бөгөөд наадмыг МНДУБХолбооны гишүүн, Хилийн Цэргийн Дуу Бүжгийн Чуулгын Зөвлөх, Хормейстер Ерөнхий шүүгч Ж.Батхүлэг, МНДУБХолбооны удирдах зөвлөлийн гишүүн, Хормейстер Шүүгч Ц.Хонгорзул, МНДУБХолбооны удирдах зөвлөлийн гишүүн, Монгол Улсын Боловсролын Их сургуулийн багш Хормейстер Шүүгч Л.Баяраа нар шүүн явуулсан юм.

Шалгаруулалтад дүүргийн Засаг даргын Тамгын газрын дарга Ж.Лхагвасүрэн, дүүргийн Соёлын төвийн дарга А.Шинэбаяр, дүүргийн Боловсролын хэлтсийн дарга Д.Ариунболд нар хүрэлцэн ирж, авьяаслаг хүүхэд багачуудад амжилт хүслээ.

Шалгаруулалтаар:
 Тэргүүн байранд: Нийслэлийн Чингэлтэй дүүргийн 24 дүгээр сургуулийн Найрал дууны хамтлаг
 Дэд байранд: Нийслэлийн Чингэлтэй дүүргийн 50 дугаар сургуулийн Найрал дууны хамтлаг
 Гутгаар байранд: Нийслэлийн Чингэлтэй дүүргийн Олонлог эгзэ сургуулийн найрал дууны хамтлаг
 Тусгай байранд: Нийслэлийн Чингэлтэй дүүргийн 72 дугаар сургуулийн Найрал дууны хамтлаг
 Тусгай байранд: Нийслэлийн Чингэлтэй дүүргийн 23 дугаар сургуулийн Найрал дууны хамтлаг
 Шилдэг удирдаач багш: Нийслэлийн Чингэлтэй дүүргийн 72 дугаар сургуулийн багш Д.Барсболд тус тус шалгарлаа.
Ийнхүү дүүргээс эхний 3 байрт шалгарсан хамтлаг дүүргээ төлөөлөн Нийслэлийн хэмжээнд зохион байгуулагдах Хоёрдугаар шатны шалгаруулалтад 2024 оны 10 дугаар сарын 21-ний өдөр оролцох юм.

БЯЦХАН ДҮҮ НАРТАА АМЖИЛТ ХҮСЬЕ.

“Аймаг, нийслэл, сум, дүүргийн иргэдийн Төлөөлөгчдийн Хурлын сонгуулийн хууль”- ийн 73 дугаар зүйлийн 73.2 дахь хэсгийн дагуу Чингэлтэй дүүргийн сонгуулийн хороо дүүргийн иргэдийн Төлөөлөгчдийн Хурлын Төлөөлөгчөөр сонгогдсонд тооцсон тухай тогтоолыг Чингэлтэй дүүргийн иргэдийн Төлөөлөгчдийн Хуралд гардуулан өглөө.

Монгол улсын Үндсэн хуулиар хүлээсэн иргэний журамт үүргээ биелүүлж, 2023 оны хоёрдугаар ээлжийн цэрэг татлагат Чингэлтэй дүүргээс зэвсэгт хүчин, хилийн болон дотоодын цэргийн анги, салбаруудад татагдаж цэргийн албаа нэр төртэй хааж үеийн нөхдөдөө үлгэр дуурайлал болсон цэрэг дайчдыг хүлээн авах арга хэмжээг зохион байгууллаа.   

Түрүүч, байлдагч нарыг Чингэлтэй дүүргийн Засаг даргын Тамгын газрын дарга Ж.Лхагвасүрэн, Цэргийн штабын дарга, хурандаа Б.Энхболд нар хүлээн авч албаа нэр төртэй хааж “Эх орны хүү” болсонд баяр хүргэн, цаашдын ажил амьдралд нь сайн сайхныг хүсэн ерөөв.

Хугацаат цэргийн жинхэнэ алба хааж халагдсан залуучуудад дүүргийн Хөдөлмөр, халамжийн үйлчилгээний хэлтэс, Хөдөлмөр эрхлэлтийн албанаас тэдний хүсэл сонирхол, ур чадварт нь нийцүүлэн таарч тохирох ажлын байранд зуучлах үйл ажиллагаа боллоо.Ийнхүү аав, ээжийн хөвгүүд нэг жилийн хугацаанд цэргийн эрдэмд шамдан суралцаж, эх орноо 365 хоног сахин хамгааллаа.

Чингэлтэй дүүргийн Иргэдийн төлөөлөгчдийн хурлын дарга Б.Мөнхбат, Засаг даргын орлогч З.Бямбажав нар дүүрэгтээ хамтын ажиллагаатай Япон улсын Шизүока мужийн Яйзү хотын “Яйзү Монголын Найрамдлын нийгэмлэг”-ийн дэд тэргүүн Сакакибара Шёожи, Яйзү хотын захиргааны албан хаагчдыг өнөөдөр хүлээн авч уулзлаа.

Уулзалтаар хоёр улсын жижиг дунд бизнес эрхлэгчдийн бараа бүтээгдэхүүнийг худалдан борлуулах, сурталчлан таниулах зорилготой уулзалт боллоо. Тодруулбал Яйзү хотын нэрэмжит тус хотын үндэсний үйлдвэрлэлийн бараа бүтээгдэхүүнийг худалдан борлуулах павильоныг Чингэлтэй дүүрэгт бий болгохоор ажиллаж байна.

Цаашлаад Япон Улсын Шизүока мужийн Яйзү хотод Чингэлтэй дүүргийн Жижиг, дунд үйлдвэрлэл  эрхлэгчдийн бараа бүтээгдэхүүнийг худалдан борлуулах, сурталчлан таниулах газартай болох юм.

Энэ удаагийн айлчлалаар “Яйзү Монголын Найрамдлын Нийгэмлэг” нь дүүргийн савхи, савхин эдлэл, ноос, ноолуур, эсгий урлалын үйлдвэрлэгчдийн үйл ажиллагаа, бараа бүтээгдэхүүнтэй танилцах юм.  Дашрамд дурдахад “Яйзү Монголын Найрамдлын Нийгэмлэг” нь 2022 оны 12 дугаар сард байгуулагдсан бөгөөд Яйзү хотод амьдардаг Монгол иргэдийн үйл ажиллагааг дэмжиж, хамтран ажиллахаар боллоо.

Сонгуулийн сурталчилгааны ухуулах хуудас болон зурагт самбар байршуулах байршил тогтоох тухай..

Чингэлтэй дүүргийн Засаг дарга Балжиннямын Мөнхбат 1-24 дүгээр хороодын өрхийн эрүүл мэндийн төвийн дарга нарыг хүлээн авч уулзаж, санал сэтгэгдлийг нь сонслоо.

Дүүргийн хүн амд эрүүл мэндийн тусламж үйлчилгээний хүртээмжийг сайжруулах, иргэдэд ойртуулах чиглэлээр ажиллаж, өрхийн эрүүл мэндийн төвүүдийн чанар хүртээмж, байрны засварын асуудлыг шат дараатай шийдэж байна.

Тухайлбал Өрхийн Эрүүл мэндийн төвүүдийн тогтмол зардлын 50%-ийг 2024 оны батлагдсан төсвийн хүрээнд дүүргийн Засаг даргын Тамгын газраас шийдвэрлэж, дүүргийн Иргэдийн Төлөөлөгчдийн хуралдаанаар хэлэлцэн 2025 онд тогтмол зардлыг 100% төлж шийдвэрлэхээр төлөвлөн ажиллаж байна.  Түүнчлэн өвөлжилтийн бэлтгэл ажлыг хангах үүднээс өрхийн эрүүл мэндийн төвүүдийн дээвэр, фасад, сантехникийн асуудлыг дүүргээс анхаарч ажиллаж байна.

Уулзалтын үеэр өрхийн эрүүл мэндийн дарга нарт дараах үүрэг даалгаврыг өглөө. Үүнд:

Эрүүл мэндийн байгууллага үндсэн чиг үүргийн хүрээнд иргэдэд чанартай, шуурхай үйлчилгээг үзүүлж ажиллах, үер усны аюулаас сэргийлэх, цахилгааны аюулгүй байдлыг хангаж ажиллах зэрэг үүрэг даалгаврыг өглөө.

Чингэлтэй дүүргийн Засаг даргын Тамгын газрын дарга Ж.Лхагвасүрэн дүүрэгтэй хамтын ажиллагаатай Япон Улсын  Шизуока мужийн Яйзү хотын Боловсролын газрын дарга Масүй Таро, Оомура дунд сургуулийн захирал Конагая Ясүхико, Гадаад харилцааны хэлтсийн мэргэжилтэн Ватанабэ Акико, Яйзү дунд сургуулийн багш Үэда Тамаё, Хигаши машизү дунд сургуулийн 7-р ангийн сурагч Мори Марика, Оомура дунд сургуулийн 9-р ангийн сурагч Оозүка Асүми нарыг өнөөдөр хүлээн авч уулзлаа.

Тодруулбал Чингэлтэй дүүрэг, Яйзү хот хооронд “Найрамдалт харилцаат хот, дүүрэг” болсны дурсгалд зориулж Яйзү хотын дунд сургуулийн сурагчдын дунд “Монголын тухай зохион бичлэгийн уралдаан”ыг Яйзү хотын захиргаанаас зохион байгуулж, уралдаанд түрүүлсэн хоёр сурагч хамтын ажиллагаанд оролцож, Чингэлтэй дүүрэгтэй танилцаж байгаа юм.

Уулзалтаар цаашид боловсролын салбарын хамтын ажиллагаагаа шинэ шатанд гаргаж сурагч солилцоог ойр ойрхон явуулах талаар санал солилцлоо.

Монгол Улсын Ерөнхийлөгчийн санаачилсан “Эрүүл Монгол хүн” үндэсний хөдөлгөөний хүрээнд зохион байгуулж буй “Зөв залуус” уриатай залуучуудын аварга шалгаруулах “Чингэлтэй цом-2024” спортын их наадам дүүргийн Хайрхан хөгжлийн төв, спорт цогцолборт өнөөдөр эхэллээ.

Уг тэмцээнд дүүргийн 1-24 дүгээр хороодын 18-35 насны 1100 гаруй залуучууд хоёр өдрийн турш спортын 9 төрөлт авьяас билиг, хурд хүч, авхаалж самбаагаа сөрөн өрсөлдөх юм.

Тэмцээний нээлтийн үйл ажиллагаанд дүүргийн удирдлагууд, хороодын Засаг дарга нар болон дүүргийн залуучууд оролцлоо.

Энэхүү тэмцээний зорилго нь дүүргийн залуучуудын амралт чөлөөт цагийг зөв боловсон өнгөрүүлэх, эрүүл зөв дадал хэвшлийг бий болгох, хөдөлгөөний хомстлоос урьдчилан сэргийлэх, спортод хандах идэвх, сонирхлыг өрнүүлэх, тамирчдын ур чадварыг дээшлүүлэх, дүүргийн залуучуудын спортын аваргыг тодруулахад оршиж байна.

Хууль сурталчлах ажлын хүрээнд Нийслэл дэх Захиргааны хэргийн анхан шатны шүүхийн Тамгын газраас дүүргийн Засаг даргын Тамгын газартай хамтран Улсын бүртгэлийн нэгдсэн системээс санамсаргүй түүврийн аргаар сонгогдсон  шүүхийн иргэдийн төлөөлөгчөөр сонгогдсон иргэдэд Монгол Улсын шүүхийн тухай хуульд заасны дагуу шүүх хуралдаанд оролцохоор сонгогдсон иргэдийн төлөөлөлд сургалт зохион байгууллаа.

Сургалтыг шүүхийн Үйлчилгээний хэлтсийн дарга Н.Амаржаргал удирдан “Шүүхийн иргэдийн төлөөлөгчийн эрх зүйн байдлын тухай хууль”, “Шүүхийн иргэдийн төлөөлөгчийг сонгон шалгаруулах, ажиллуулах журам”-ыг танилцуулж, Захиргааны шүүхийн онцлог, шүүхийн иргэдийн төлөөлөгч гэж хэнийг ойлгох, шүүхийн иргэдийн төлөөлөгчийн оролцоо, эрх, үүрэг, ач холбогдол, шүүх хуралдаан дээр санал, дүгнэлт гаргахад анхаарах асуудал болоод иргэдийн төлөөлөгчид олгох цалин хөлсний талаар холбогдох мэдээ мэдээллийг 65 иргэнд өгч, тэдний санал сэтгэгдлийг сонсож, асуултад хариулт өглөө.

Чингэлтэй дүүргийн “Тохижилт, нийтийн аж ахуйн хэлтэс “ “Бичил глобус” санхүүгийн байгууллага хамтран нийгмийн хариуцлагын хүрээнд дугуйн зогсоолууд байршууллаа.

Улаанбаатар хотод дугуйгаар зорчигчдод тулгардаг томоохон асуудлын нэг унадаг дугуйн зогсоол хангалтгүй мөн чанарын шаардлага хангаагүйн улмаас дугуйн их бие зурагдах, хулгайд алдах зэрэг асуудлууд тулгардаг бол дараах байршлуудад стандартын шаардлага хангасан дугуйн зогсоолуудаа байршууллаа

- ЧД Ялалтын талбай
- 5-р сургууль
- Соёл урлагийн их сургууль
- Чингэлтэй дүүргийн эрүүл мэндийн төв
- ЧД Эрүүл мэндийн төв
- Өглөөний гудамж
- Явуухулангийн цэцэрлэгт хүрээлэн
- Баянбүрд орчим
- 24-р сургууль
- Компьютер ланд төв зэрэгт байршууллаа. Удахгүй танай гэрийн гадаа дугуйн зогсоол байршсан байх боломжтой юм.

Нийт Аж ахуйн нэгжүүдийг эрүүл хөдөлгөөнт амьдралын хэв маягийг бодитоор дэмжин ажиллахыг уриалж байна.

Чингэлтэй дүүргийн удирдах ажилтны ээлжит шуурхай хуралдаан өнөөдөр боллоо.  

Хуралдааныг Чингэлтэй дүүргийн Засаг даргын Тамгын газрын дарга Ж.Лхагвасүрэн удирдан явууллаа.

Өнгөрсөн зөвлөгөөнөөр өгсөн үүрэг даалгаврын биелэлтийн талаар дүүргийн Төрийн захиргааны удирдлагын хэлтсийн дарга Б.Нацагдорж мэдээлэл өглөө.

Мөн дүүргийн Ахмадын хороо, Соёлын төв, “Хайрхан хөгжлийн төв”-өөс мэдээлэл хийлээ.

Дүүргийн Засаг даргын Тамгын газрын дарга Ж.Лхагвасүрэн удирдах ажилтнуудад үүрэг даалгавар өглөө.

Иргэдийн аюулгүй байдлыг хангах орчин нөхцлийг бүрдүүлэх, хог цэвэрлэгээ, ариутгалын ажилд анхаарах, иргэдээс ирсэн өргөдөл гомдлын шийдвэрлэлийг цаг тухай бүрт нь шийдвэрлэх, иргэдийн санал хүсэлтийг сонсож ажиллахыг даалгалаа.