Чингэлтэй дүүргийн 14, 18 дугаар хорооны гэр хорооллын дахин төлөвлөлтийн зураг төслийг та бүхэнд танилцуулж байна.  Гэр хорооллын дахин төлөвлөлтийн загвар төслийн талбай нь 214 га  бөгөөд Улаанбаатар хотын төв талбайгаас 5,5 км зайд Чингэлтэй дүүргийн 14,18-р хорооны нутаг дэвсгэр хамаарч буй. Барилгажилтын төслөөр иргэдийг тохилог ногоон орон сууцаар хангасан, нийгмийн дэд бүтцийн хүртээмжтэй, амралт, аялал зугаалгын бүс бүхий эрүүл ногоон хороолол бий болгоход чиглэн төлөвлөсөн.

Энэхүү төслийн хүрээнд хотын төв болон зуслангийн бүс, гэр хорооллын нийгэм эдийн засгийн хөгжлийг холбосон ухаалаг, цомхон байх төлөвлөлтийн зарчмыг баримтлан төслийг боловсруулсан байна.

Манай улс жил бүрийн 4 дүгээр сарыг хөдөлмөрийн аюулгүй байдал, эрүүл ахуйн сар болгон зарлаж, ХАБЭА-н урьдчилан сэргийлэх арга хэмжээнүүдийг улс орон даяар зохион байгуулдаг.

Энэ жил үйлдвэрлэлийн орчин нөхцөлийг сайжруулах, ажилтныг ажлын байран дахь осол, мэргэжлээс шалтгаалсан өвчлөл болон бусад эрсдэлт хүчин зүйлийн нөлөөллөөс хамгаалах, урьдчилан сэргийлэх, ажлын байрны соёлыг төлөвшүүлэхэд төрийн болон төрийн бус байгууллагуудыг татан оролцуулах тэдний сайн туршлагыг олон нийтэд түгээн дэлгэрүүлэх ажлыг эрүүл аюулгүй ажил-бидний суурь эрх уриан дор тэмдэглэж байна.

Энэ хүрээнд дүүргийн хөдөлмөрийн аюулгүй байдал, эрүүл ахуйн зөвлөлийн гишүүдэд Хөдөлмөрийн аюулгүй байдал, эрүүл ахуйн тухай хууль тогтоомж, холбогдох дүрэм журмын хэрэгжилтийн талаар мэдлэг олгох, чадавхжуулах зорилготой анхдугаар зөвлөгөөнийг зохион байгууллаа.

Чингэлтэй дүүргийн Засаг даргын Тамгын газар, Хөдөлмөр халамж үйлчилгээний хэлтэс, Хөдөлмөрийн аюулгүй байдал, эрүүл ахуйн салбар зөвлөл, нийслэлийн Ажил олгогч эздийн холбоо, Улаанбаатар хотын Үйлдвэрчний эвлэлийн холбоо хамтран зохион байгуулж буй уг зөвлөгөөнд дүүргийн 1-24 дүгээр хороодын дэргэдэх “Хөдөлмөрийн аюулгүй байдал, эрүүл ахуйн салбар зөвлөл”-ийн гишүүд зэрэг нийт 120 хүн хамрагдлаа.

Зөвлөгөөнийг дүүргийн Засаг даргын Тамгын газрын Хяналт шинжилгээ, үнэлгээний хэлтсийн дарга Н.Наранзул нээж, ХАБЭА-н салбар зөвлөлийн дарга болон холбогдох мэргэжилтнүүд илтгэл, хэлэлцүүлгийг гишүүдийн дунд өрнүүллээ.

Дэлхий нийтээрээ дөрөвдүгээр сарын 30-ны өдрийг “Хүүхдийг зодож шийтгэхийн эсрэг өдөр” болгон тэмдэглэдэг билээ.

Энэхүү өдрийг угтан Чингэлтэй дүүргийн төрийн өмчийн цэцэрлэгүүдийн багш, сурган хүмүүжүүлэгч нарын дунд хүүхэд хүмүүжүүлэх эерэг аргыг сурталчлан таниулах, багш нарын судалгаа шинжилгээ хийхийг дэмжих, хүүхэд хамгаалал, ёс зүйн асуудлуудад судалгаатай шийдлийг санал болгох, хэрэгжүүлэх зорилгоор “Шийтгэл бол шийдэл биш” эрдэм шинжилгээнийг зарласан юм.

Багш, сурган хүмүүжүүлэгч нарын илтгэлийг хэлэлцэх эрдэм шинжилгээний хурлыг өнөөдөр Чингэлтэй дүүргийн Тамгын газарт зохион байгууллаа.

Өнөөдрийн эрдэм шинжилгээний хурлаар цэцэрлэгийн таван бүсээс шалгарсан эхний 10 илтгэлийг сонслоо. Энэхүү 10 илтгэлийг хэлэлцэн Хүүхдийг зодож шийтгэхийн эсрэг өдөр буюу дөрөвдүгээр сарын 30-ны өдөр шилдэг таван илтгэлийг шалгаруулах юм.

Улаанбаатар хотод тулгамдаж буй асуудлыг шийдвэрлэх хөгжлийн томоохон бүтээн байгуулалтад гадаад, дотоодын хөрөнгө оруулагчдыг татан оролцуулах, төр, хувийн хэвшлийн түншлэлийг өргөжүүлэх зорилгоор нийслэлийн Засаг даргын Тамгын газар, Улаанбаатар хотын Худалдааны танхим хамтран “Шинэ сэргэлт-Улаанбаатар” уриан дор “Улаанбаатар-Олон улсын хөрөнгө оруулалт, түншлэлийн форум” зохион байгуулагдсан.

Тус форумын үеэр Чингэлтэй дүүргийн Засаг дарга Н.Батсүмбэрэл дүүргийн 14, 18 дугаар хороодод хэрэгжих Гэр хорооллын дахин төлөвлөлтийн загвар төслийн талаар танилцуулсан юм. Гэр хорооллын дахин төлөвлөлтийн энэхүү төсөл 214 га талбайд хийгдэхээр төлөвлөгджээ.

Газрын онцлогоос шалтгаалан нам түвшний газарт өндөр барилга байгууламж, өндөрлөг газарт нам эко барилга байхаар төлөвлөсөн. Төсөл хэрэгжих 214 га талбайд одоогоор 4600 гаруй айл өрх амьдарч байна. Төлөвлөлтөд тусгагдсан орон сууцанд 4700 өрх амьдрах, нийт талбайн 97.2 га буюу нийт талбайн 40 гаруй хувьд ногоон байгууламж байх юм.

Мөн тус хэсэг нь бие даасан инженерийн байгууламж буюу Сэлбэ дэд төвийг түшиглэн хийгдэнэ. Төсөл хэрэгжих байршил нь төв зам дагуу, нийтийн тээврийн зогсоолд ойр, нийгмийн дэд бүтцийн хүртээмж сайн, зам дагуу худалдаа, үйлчилгээг дагасан хүн амын эрчим өндөр зэрэг олон давуу талтай. Дулаанаас бусад инженерийн шугам сүлжээнд холбогдох боломжтой бөгөөд “Тэрбум мод” үндэсний хөтөлбөртэй уялдаж буйгаараа онцлог. Энэхүү төсөл нь Улаанбаатар хотын хойд бүсийн гэр хорооллын дахин төлөвлөлтийг шийдэх чухал ач холбогдолтой.

Энэ хэсэгт нийт 168 мянга орчим оршин суугчдын төвлөрөл бий. Энэ нь цаашлаад Улаанбаатар хотын хөрсний бохирдол, түгжрэлийг бууруулах, төвлөрлийг сааруулах, олон төвт хотыг бий болгох чухал ач холбогдолтойг Чингэлтэй дүүргийн Засаг дарга Н.Батсүмбэрэл онцолсон юм.

 Чингэлтэй дүүргийн Дотоод аудитын алба нь Сангийн сайдын баталсан СХШХ/02 дугаартай хяналт шалгалтын удирдамжийн хүрээнд Чингэлтэй дүүргийн нийгмийн даатгалын хэлтэст хяналт шалгалтын ажлыг хийж байна.

Манай улс жил бүрийн 4 дүгээр сарын 28-ны өдрийг “Монгол генералын өдөр” болгон тэмдэглэн өнгөрүүлдэг билээ. Энэ жил “Монгол генералын өдөр” 79 дэх жилдээ болж байна.

Чингэлтэй дүүргийн Засаг дарга Н.Батсүмбэрэл генералын өдрийг тохиолдуулан “Эрхэм генералууд” хүндэтгэлийн арга хэмжээг зохион байгуулж Чингэлтэй дүүргийн иргэн генералуудыг хүлээн авч хүндэтгэл үзүүллээ.

“Эрхэм генералууд” арга хэмжээнд дүүргийн 1 дүгээр хорооны оршин суугч Монгол Улсын гавьяат хуульч, хошууч генерал С.Дамдинсүрэн, 3 дугаар хорооны оршин суугч Батлан хамгаалахын Ерөнхий хянан шалгагч, бригадын генерал Ж.Болдбаатар, Онцгой байдлын Ерөнхий газрын тэргүүн дэд дарга бөгөөд штабын дарга, бригадын генерал Ж.Чүлтэмсүрэн нарыг хүлээн авч уулзав.

Алтан мөрдэст генералуудаараа бахархах, тэдний гавьяа зүтгэл, дайчин уламжлалыг нь хойч үеийнхэнд өвлүүлэх, монгол бахархлыг түгээн дэлгэрүүлэх зорилгоор Засаг даргын нэрэмжит Цэрэг-спортын “Дөл” тэмцээнд ажилттай оролцсон Ерөнхий боловсролын 5, 23, 24, 50 дугаар сургуулийн сурагчдыг хүндэтгэлийн арга хэмжээнд оролцуулав.

Монгол Улсад генерал цол олгож эхэлснээс хойших 79 жилийн хугацаанд 219 цэргийн зүтгэлтэн энэ эрхэм цолыг хүртээд байна.

Чингэлтэй дүүргийн Ерөнхий боловсролын 5, 23, 24 дүгээр сургуульд Энхтайваны корпусын сайн дурын багш нар англи хэлний багшаар ажиллаж байна. Энэ жил шинээр томилогдон ирсэн багш нарыг дүүргийн Засаг дарга Н.Батсүмбэрэл хүлээн авч уулзаж, санал солилцлоо.

Чингэлтэй дүүргийн 5 дугаар сургуульд англи хэлний багшаар ажиллаж буй Коннер Мооре нь сурагчид болон багш нарт англи хэлний боловсрол олгох, клубуудын үйл ажиллагааг дэмжих арга зүйн зөвлөгөө өгөх, олон нийтэд чиглэсэн үйл ажиллагаа явуулах чиглэлээр ажиллах юм.

Энхтайваны корпусын сайн дурын ажилтан Дарси Майер нь Монгол Улсад 6 сарын өмнө ирсэн бөгөөд энэ оны нэгдүгээр сараас эхлэн 24 дүгээр сургуульд англи хэлний багшаар ажиллаж байгаа юм. Тэрээр АНУ-ын Пенсильвани мужид эмнэлгийн нийгмийн ажилтнаар 37 жил ажилласан бол 23 дугаар сургуулийн багш Кристофер Визда нь боловсролын салбарт дөрвөн жил ажилласан туршлагатай аж.

Тэрээр ОХУ-д байрлах Британийн хувийн сургууль, цэцэрлэгт багшаар ажиллаж байгаад манай улсад иржээ. Гадаад багш нар дүүргийн ерөнхий боловсролын сургуульд багшлахдаа таатай байгаагаа дүүргийн удирдлагад илэрхийлж, багшилж буй сургуулийнхаа соёл, хандлагыг сайжруулах, сурагч, багш, хамт олныг хөгжүүлэх ажилд тусалж ажиллана гэдгээ дүүргийн Засаг даргад хэллээ.

Чингэлтэй дүүргийн Засаг дарга Н.Батсүмбэрэл өнөөдөр дүүргийн Ерөнхий боловсролын сургуулийн удирдлагуудтай уулзлаа. Уулзалтаар сургуулийн удирдлагуудад хэрэгжүүлэх шаардлагатай зарим үүрэг даалгаврыг өгөв.

Ерөнхий боловсролын сургуулиуд нөөц боломжиндоо тулгуурлан зарим урсгал засварын ажлыг шийдэх, хүүхдүүдийн эрүүл сурч боловсрох орчин нөхцлийг сайжруулж ажиллахыг үүрэг болголоо.

Сургуулийн орчинд хүүхдийн аюулгүй байдлыг хангасан бүхий л нөхцөл боломжоор хангаж, хашаа хайс буулгах, ногоон байгууламжийг нэмэгдүүлэх тал дээр санаачлага гаргах, сургуулийн автобусууд хэрэгцээ, маршрутад хяналт тавьж хамгийн гол нь аюулгүй байдлыг чухалчлан ажиллахыг Засаг дарга Н.Батсүмбэрэл санууллаа.

Дүүргийн удирдлагад сургуулийн захирлууд бүтээн байгуулалтын ажлын явц болон хөрөнгө оруулалтын ажлууд, багшийн ёс зүйн асуудлаар цаг үеийн мэдээллээ танилцуулав.

Чингэлтэй дүүргийн Хүүхдийн эрхийн хууль зүйн хорооны ээлжит хуралдааныг өнөөдөр Засаг даргын Тамгын газрын Хурлын танхимд зохион байгууллаа. Хурлыг дүүргийн Засаг даргын орлогч Д.Отгонбаатар удирдан явуулав.

Европын холбооны санхүүжилтээр Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газар, Олон улсын хөгжлийн эрх зүйн байгууллагатай хамтран хэрэгжүүлж буй “Хүүхэд хамгааллын тогтолцоог бэхжүүлэх” төслийн хүрээнд гэмт хэрэг, зөрчилд холбогдогч, хохирогч хүүхдэд үзүүлэх кейс менежментийг сайжруулах ментор хөтөлбөрт хамрагдах хоёр дүүргийн нэгээр Чингэлтэй дүүргийн Хүүхдийн эрхийн хууль зүйн хороо сонгогдсоныг мэдэгдлээ.

Тус “Ментор хөтөлбөр” нь 2023 оныг дуустал 2 дүүрэг, 11 аймагт хэрэгжих бөгөөд хөтөлбөр хэрэгжсэнээр гэмт хэрэг, зөрчилд холбогдсон болон хохирогч хүүхдэд үзүүлэх үйлчилгээний чанар хүртээмжийг сайжруулах, эрчимжүүлэх ач холбогдолтой болж байгаа юм.

Сүхбаатар, Чингэлтэй дүүргийн Иргэний хэргийн анхан шатны шүүхийн Тамгын газар, дүүргийн Засаг даргын Тамгын газартай хамтран 1-24 дүгээр хороодын шүүхийн иргэдийн төлөөлөгчөөр сонгогдсон иргэдэд Монгол Улсын шүүхийн тухай хуульд заасны дагуу шүүх хуралдаанд оролцохоор сонгогдсон иргэдийн төлөөлөлд сургалт зохион байгууллаа.

Монгол Улсын шүүхийн тухай хуулийн 65 дугаар зүйлийн 65.33-т заасны дагуу шүүх хуралдаанд иргэдийн төлөөлөгчөөр оролцохын ач холбогдол, шүүхийн иргэдийн төлөөлөгчийг хэрхэн сонгодог, хуралд оролцох иргэдийн төлөөлөгчид тавигдах шаардлага болон иргэдийн төлөөлөгчдөд олгох цалин хөлс мөн шүүх хуралдаанд оролцохын давуу талын талаарх мэдээллийг иргэдэд өгөв.

Мөн шүүхийн бус журмаар шүүх дэх эвлэрүүлэн зуучлагчийн дэмжлэгтэйгээр хэрэг маргааныг шийдвэрлэх ажиллагааны эрх зүйн зохицуулалт ялангуяа иргэний эрх зүйн болон гэр бүлийн холбогдолтой хэрэг маргаан, хөдөлмөрийн ганцаарчилсан маргаанд эвлэрүүлэн зуучлалыг хэрэглэдэг тухай мэдээллийг ийнхүү 150 гаруй иргэнд өгч санал сэтгэгдлийг сонсож, асуултад хариулт өглөө.