Нийслэлийн удирдах ажилтнуудын шуурхай зөвлөгөөн өнөөдөр боллоо. Хотын дарга өмнөх шуурхай зөвлөгөөнөөр 11 чиглэлээр үүрэг, даалгавар өгснөөс хэрэгжилт 83.6 хувьтай байжээ. Тухайлбал, сайжруулсан шахмал түлш хэрэглэх заавар зөвлөгөө, сэрэмжлүүлгийг тогтмол өгч, зуух яндангийн битүүмжлэл, аюулгүй байдлыг хангуулж, хяналтын үйл ажиллагааг эрчимжүүлж ажиллахыг үүрэг болгосон. Өнөөдрийн байдлаар 59 агуулахад 116 мянган тонн сайжруулсан шахмал түлшний нөөц байна. Мөн борлуулалтын 650 цэгт 310 тээврийн хэрэгслээр өдөрт дунджаар 2000-2200 тонн түлшийг ханган нийлүүлж байгаа юм.

Шуурхай зөвлөгөөний төгсгөлд Нийслэлийн Засаг дарга бөгөөд Улаанбаатар хотын Захирагч Д.Сумъяабазар нийслэлийн нутгийн захиргааны байгууллагууд төсвийн мөнгөөр шинэ жил тэмдэглэхгүй гэдгийг хэллээ.

Чингэлтэй дүүргийн Засаг дарга Н.Батсүмбэрэл дүүргийн иргэдтэй хийх 15 дахь удаагийн уулзалтаа 1, 2, 3 дугаар хорооны иргэдийг хамруулж “Иргэдээ сонсъё” уулзалт зохион байгуулж, тэдний санал хүсэлтийг сонсож ажиллалаа.

Уулзалтын эхэнд Чингэлтэй дүүрэгт улс, нийслэл, орон нутгийн хөрөнгө оруулалтаар хийгдэж буй хөрөнгө оруулалт, бүтээн байгуулалтын ажил, боловсрол, эрүүл мэндийн салбарын тулгамдсан асуудлууд болон төр захиргааны байгууллагуудын үйл ажиллагааг иргэдэд танилцуулав.

Мөн 1 дүгээр хороог "Ногоон бүс" болсныг онцлон 145 камерыг шинээр байршуулж, гэмт хэрэг, зөрчил, болзошгүй эрсдэлээс урьдчилан сэргийлж, иргэдийн аюулгүй амьдрах орчныг бүрдүүлсэн талаар, түүнчлэн дүүргийн бүх хороог "Ногоон бүс" болгон төлөвлөн ажиллаж байгааг дурдлаа. Цаашид энэхүү уулзалтыг жилд хоёр удаа хийж байх бөгөөд өмнөх уулзалтад оролцож, санал хүсэлтээ илэрхийлсэн иргэдийн асуудлыг шийдвэрлэж ажилласан талаарх мэдээллийг эргэн уулзаж ярилцаж байхаа онцлон хэлсэн юм.

Иргэдийн уулзалтад хүрэлцэн ирж санал хүсэлтээ илэрхийлсэн иргэдийн дийлэнх нь байрны сантехник, дулаан хангамжийн угсралт тоног төхөөрөмжийг сайжруулж өгөх, гадна фасад, дээврийн ус гоожилт, автомашины зогсоол хүртээмжийг нэмэгдүүлж өгөх, хог ачилт, урт цагааны байрны талаар анхааралдаа авч өгөхийг хүслээ. Засаг даргын хувьд дээрх асуудлуудыг холбогдох хэлтсийн дарга нарт уламжилж, яаралтай шийдвэрлэхийг үүрэгдлээ.

Уулзалтад санал хүсэлтээ илэрхийлэхээр ирсэн иргэдээс гадна дүүргийн хэлтэс албадын дарга нар болон тухайн тойргоос сонгогдсон дүүргийн ИТХ-ын төлөөлөгчид, хороодын Засаг дарга, сургууль цэцэрлэгийн удирдлагууд оролцлоо.

Чингэлтэй дүүргийн Засаг дарга Н.Батсүмбэрэл 4, 5, 6 дугаар хороонд “Иргэдээ сонсъё” уулзалт зохион байгуулж, тэдний санал хүсэлтийг сонсож, газар дээр нь шийдвэрлэж ажиллалаа.

Уулзалтын эхэнд Чингэлтэй дүүрэгт улс, нийслэл, орон нутгийн хөрөнгө оруулалтаар хийгдэж буй хөрөнгө оруулалт, бүтээн байгуулалтын ажил, боловсрол, эрүүл мэндийн салбарын тулгамдсан асуудлууд болон төр захиргааны байгууллагуудын үйл ажиллагааг иргэдэд танилцуулав.

Тухайлбал, дүүргийн эрүүл мэндийн тусламж үйлчилгээ маш хангалтгүй байгааг дурдаад үүнийг сайжруулахын тулд ямар ямар ажил хийж байгаагаа танилцуулав. Мөн төрийн үйлчилгээг аль болох иргэдэд ойртуулж, чирэгдэл учруулахгүй байх тал дээр анхаарч ажиллаж байгаагаа онцоллоо. Тухайлбал, “Нэг цэгийн үйлчилгээ”-ний байранд засвар хийж, тус үйлчилгээг 2-3 байршилд нэмж байгуулан ажиллаж байгаа юм. Цаашлаад “Нэг цэгийн үйлчилгээ”-г 24 цаг тасралтгүй ажиллуулахаар төлөвлөж байгаагаа мэдэгдлээ.

Иргэдийн хувьд ая тухтай амьдрах нөхцөл боломжоор хангаж өгөхийг Засаг дарга болон холбогдох албаны мэргэжилтнүүдээс хүсэж байлаа. Тодруулбал, байрны сантехник, дулаан хангамжийн угсралт тоног төхөөрөмжийг сайжруулж өгөх, автомашины зогсоол хүртээмжийг нэмэгдүүлж өгөх, шинээр баригдаж буй цэцэрлэгийг ашиглалтад оруулах, 5 дугаар сургуулийн өргөтгөлийн ажлыг хурдан шуурхай дуусгаж ашиглалтад оруулах, хог ачилтын талаар анхааралдаа авч өгөхийг хүслээ.

Засаг даргын хувьд дээрх асуудлуудыг холбогдох хэлтсийн дарга нарт уламжилж, яаралтай шийдвэрлэхийг үүрэгдлээ. Уулзалтад дүүргийн хэлтэс албадын дарга нар болон тухайн тойргоос сонгогдсон дүүргийн ИТХ-ын төлөөлөгчид, хороодын Засаг дарга, сургууль цэцэрлэгийн удирдлагууд оролцлоо.

Хөгжлийн бэрхшээлтэй хүний олон улсын өдрийг тохиолдуулан дүүргийн хөгжлийн бэрхшээлтэй иргэдийн санаа бодлыг сонсох, хөгжлийн бэрхшээлтэй болон хөгжлийн бэрхшээлтэй гэрийн бүлийн гишүүдээ асардаг эцэг эх, өрхийн үйлдвэрлэл эрхлэгч иргэдийг дэмжих зорилготой “Хамтдаа өөрчлөгдье – Хамтдаа хөгжье” уулзалт, өдөрлөгийг өнөөдөр зохион байгууллаа.

Уулзалтад Чингэлтэй дүүргийн Засаг дарга Н.Батсүмбэрэл, Засаг даргын орон тооны зөвлөх Ч.Болормаа, дүүргийн Хөдөлмөр, халамжийн үйлчилгээний хэлтсийн дарга А.Сэрээтэр, Нийгмийн даатгалын хэлтсийн дарга Н.Ариунаа, Биеийн тамир, спорт хорооны хэлтсийн дарга Ц.Баянмөнх болон хороодын дарга, холбогдох хэлтэс албадын дарга нар оролцож иргэдийн санал хүсэлтийг сонслоо.

Чингэлтэй дүүргийн Засаг дарга, дүүргийн хөгжлийн бэрхшээлтэй хүний эрхийг хангах салбар зөвлөлийн дарга Н.Батсүмбэрэл уулзалтыг нээж үг хэллээ.

Чингэлтэй дүүрэгт 4400 гаруй хөгжлийн бэрхшээлтэй иргэд байгаагаас 500 гаруй нь хүүхэд юм. Эдгээр хүмүүсийн нийгмийн баталгааг хангах, тэдэнд чиглэсэн төрийн үйлчилгээний талаар болон дүүргийн зүгээс хийж хэрэгжүүлж буй ажлын талаар мэдээлэл өглөө.

Уулзалтад ирсэн иргэд дүүргийн удирдлагуудад хандаж санал хүсэлтээ хэллээ. Хөгжлийн бэрхшээлтэй иргэдийн өмнө хамгийн тулгамдсан асуудал бол нийгмийн халамжийн асуудал бөгөөд тэднийг орон сууцаар хангах төрийн дэмжлэг хэрэгтэй байгааг дуулгалаа. Мөн асаргаанд байгаа хүүхдээ хардаг эцэг эхийг дэмжих, тэднийг төрийн уян хатан бодлогоор харж хандах хуулийн зохицуулалт хэрэгтэй байгааг хэлж байна. Хөгжлийн бэрхшээлтэй иргэд ажил хийх хүсэл дүүрэн байдаг. Хэдийгээр аж ахуй нэгж байгууллага 25 хүнээс дээш ажилтантай бол 1 хөгжлийн бэрхшээлтэй иргэнийг ажлын байраар хангах ёстой боловч энэ ажил хөрсөн дээр буухгүй байна гэж иргэд саналаа хэллээ. Тиймээс энэ зохицуулалтыг цаашид анхаарч хөгжлийн бэрхшээлтэй иргэдийг ажлын байраар хангах, эзэмшсэн мэргэжлийнхээ дагуу ажил хийх хүсэл сонирхлыг нь дэмжиж ажиллахыг хүссэн юм.

Мөн хөгжлийн бэрхшээлтэй иргэдэд эмнэлгийн болон төрийн тусламж үйлчилгээг авахад орчны болон тухайн иргэний бэрхшээлийн онцлогыг харгалзан зохицуулалт хийж өгөхийг хүсэв. Жишээлбэл зарим нэг төрлийн үйлчилгээнд харааны бэрхшээлтэй иргэдэд зориулсан баррель үсэг бүхий хаягжуулалт хийх, тэргэнцэртэй, таягтай иргэдэд зориулсан налуу шат, үйлчилгээний орчин нөхцлийг бүрдүүлж өгөхийг хүслээ.

Чингэлтэй дүүргийн зүгээс энэ оны байдлаар “Нийгмийн халамж үйлчилгээ үзүүлэх журам”-ын дагуу 24 хөгжлийн бэрхшээлтэй иргэдэд зохих журмын дагуу нийгмийн асуудлыг нь шийдвэрлэсэн байна. Цаашид хөгжлийн бэрхшээлтэй иргэдийн дуу хоолойг тогтмол сонсох, хамтран ажиллах, асуудлыг шийдвэрлэх зарчмаар ажиллах хэрэгтэйг Засаг дарга уулзалтын үеэр хэллээ.

Мөн Чингэлтэй дүүргийн хөгжлийн бэрхшээлтэй иргэдэд нэн таатай мэдээг дуулгалаа. Дүүргийн Биеийн тамир, спорт хорооноос дүүргийн харьяатай хөгжлийн бэрхшээлтэй иргэд 6 төрлийн үйлчилгээг үнэ төлбөргүй авах боломжоор хангаж байна. Үүнд: - Фитнесс, нисдэг таваг, ширээний шагай, нийтийн бүжиг, иог хийн дасгал, Боучи гэсэн 6 төрлийн спортоор үнэ төлбөргүй хичээллэх боломжтой юм.

Дүүргийн Засаг даргын зүгээс хөгжлийн бэрхшээлтэй хүүхдээ асрахын зэрэгцээ өрхийн бичил бизнес эрхлэгч иргэдийн гарааны бизнесийг дэмжин 15 дугаар хорооны иргэн А.Ундармаа, 19 дүгээр хорооны иргэн Д.Цэвээнсүрэн, 7 дугаар хорооны иргэн Х.Эрдэнэбаатар нарт батламж гардуулан, дэмжлэг үзүүллээ.

Уулзалт, өдөрлөгийн үеэр иргэдэд зориулсан эрүүл мэндийн тусламж үйлчилгээ, улсын бүртгэл, нийгмийн даатгал, татвар, хөдөлмөр, халамжийн үйлчилгээний чиглэлээр төрийн үйлчилгээг хүргэж байна. Мөн жижиг үйлдвэрлэл эрхлэгч, хөгжлийн бэрхшээлтэй иргэд өөрсдийн үйлдвэрлэгчид өөрсдийн бүтээгдэхүүнээр үзэсгэлэн гаргалаа.

Чингэлтэй дүүргийн 1-24 дүгээр хороодын Засаг дарга нарын ээлжит шуурхай хурал боллоо. Хурлыг дүүргийн Засаг дарга Н.Батсүмбэрэл, Засаг даргын орлогч Д.Отгонбаатар нар удирдан явуулж хороодод тулгамдаж буй асуудал, ажилтан албан хаагчдад тулгараад буй нөхцөл байдлыг сонслоо.

 

Чингэлтэй дүүрэг 24 хороотой. Үүнээс 1-6 хороо байшин хороо, үлдсэн нь гэр хороолол хамаардаг. Тиймээс ч иргэдээс тавьж буй санал, гомдол харилцан адилгүй. Уулзалтын эхэнд хороодын нөхцөл байдал болон тулгамдаж буй асуудлыг сонслоо. Засаг дарга нарын мэдээлж буйгаар хороодын өдөр тутмын ажил хэвийн явагдаж байгаа боловч түлшний цэгийг нэмэгдүүлэх, золбин нохой муурыг устгах ажилд нэгдсэн журмаар бодлогын арга хэмжээ авах шаардлагатайг хэлж байлаа. Мөн хогны менежментийг сайжруулж, хог тээвэрлэлтийн компаниудад тавих шаардлагыг өндөрсгөх шаардлагатайг хэллээ.

Харин дүүргийн удирдлагуудын зүгээс зам талбайн цасыг цэвэрлэх, хороодын нутаг дэвсгэр дэх нийтийн эзэмшлийн байгууламжийн ашиглалт, хамгаалалтыг хариуцах, галын аюул, угаарын хийн аюулаас урьдчилан сэргийлэх ажлыг тогтмол явуулж, газар чөлөөлөлтийг шуурхайлах, төсвийн сахилга батыг сахих, иргэдэд хүнд сурталгүй, чирэгдэлгүй үйлчилж, гомдол саналыг шуурхай шийдвэрлэдэг байх, амьдрах орчныг сайжруулах, тав тухтай орчин бүрдүүлж ажиллахыг хороодын Засаг дарга нарт үүрэг болголоо.

Чингэлтэй дүүргийн төрийн болон төрийн бус өмчийн Ерөнхий боловсролын сургуулийн 1-12 дугаар ангийн сурагчдийн дунд "Япон улсыг хэн сайн мэдэх вэ?" гар зураг, эссэ бичлэгийн уралдааныг зарлаж байна.

Чингэлтэй дүүргийн Засаг даргын Тамгын газар, Япон улсын Яйзү хотын захиргаа хамтран энэхүү уралдааныг зарлаж байна.

Сурагчид та бүхэн уралдаанд идэвхтэй оролцоорой.

Чингэлтэй дүүргийн Засаг даргын Тамгын газар, Боловсролын хэлтэс, Чингэлтэй дүүргийн Залуу багш нарын холбоо хамтран дүүргийн залуу багш нарын мэргэжлийн ур чадварыг дээшлүүлэх, харилцан суралцаж хамтдаа хөгжих, хамт олноо манлайлах боломжийг дэмжих, тэдний сайн туршлагыг нь түгээн дэлгэрүүлэх зорилготой уралдаан зохион байгууллаа.

Тус уралдаанд төрийн ба төрийн бус өмчийн 23 сургуулийн 1-5 дахь жилдээ ажиллаж байгаа 30 багш 6 багт хуваагдан оролцлоо.

Уралдааны төрөл:

Сэтгэлгээний ур авьяас - Эсээ бичлэг

Мэргэжлийн ур авьяас - Интеграци хичээл

Илэрхийлэх ур авьяас- Өгүүллэг унших

Бүтээмжийн ур авьяас - Хамтын бүтээл (Шторк)

Урлагийн ур авьяас-Чөлөөт үзүүлбэрийн төрлүүдээр оролцов.

Тэмцээний шүүгч зөвлөн туслагчаар дүүргийн 19 “Зөвлөх” багш нар ажиллан үнэт зөвлөгөө өгч харилцан суралцаж, ахмад залуу үеийн залгамж холбоог бататгасан үр дүнтэй шинэлэг үйл ажиллагаа боллоо.

Тэмцээний шагналт байранд орсон багуудад дүүргийн Засаг даргын Тамгын газрын дарга П.Баянбаатар, Боловсролын хэлтсийн дарга Ш.Оюунсүрэн, ЕБС-ийн захирал нар гардуулан өгч, амжилт хүслээ.

“ЗАЛУУ БАГШ - МАНЛАЙЛАЛ” УР АВЬЯАС” уралдаанд:

“Алтан гадас” баг шалгарч нэгдсэн дүнгээр тэргүүн байр

Манлайлагч баг дэд байр

Оюуны ундарга баг гуравдугаар байрын эзэд боллоо.

•Мэргэжлийн ур авьяас - Интеграци хичээлийн төрөлд:

"Манлайлагч" баг,

Урлагийн ур авьяас-Чөлөөт үзүүлбэрийн төрөлд "Зөв тусгал" баг шилдгээр шалгарлаа.

Чингэлтэй дүүргийн Засаг даргын Тамгын газрын ажилчид, албан хаагчдыг чадавхижуулах сургалт боллоо.

Сургалтын эхэнд ЗДТГ-ын Төрийн захиргааны удирдлагын хэлтсийн дарга Л.Баярмаа цаг үеийн холбогдолтой мэдээ, мэдээллээр хангалаа.

Үүний дараа Монгол Улсын “Архив, албан хэрэг хөтлөлтийн тухай” хууль тогтоомжийн хэрэгжилтийг хангах зорилгоор “Албан бичиг хэрэг хөтлөлтийн журам”-ыг Архив, бичиг хэргийн тасгийн дарга Д.Аззаяа танилцуулав.

Монгол Улсын “Архив, албан хэрэг хөтлөлтийн тухай” хууль тогтоомжийн хэрэгжилтийг хангах, байгууллагын архив, албан хэрэг хөтлөлтийн үйл ажиллагаанд хяналт шалгалт хийх ажлын хүрээнд Нийслэлийн Архивын газраас дүүргийн Засаг даргын Тамгын газрын Архивын тасгийн үйл ажиллагаанд хяналт шалгалт хийлээ.

Ажлын хэсгийн бүрэлдэхүүнд Нийслэлийн Архивын газрын Архив, албан хэрэг хөтлөлтийн хяналтын Улсын байцаагч Ц.Дунгармаа, Архивын асуудал хариуцсан ахлах мэргэжилтэн Д.Чимэдрагчаа, Төрийн болон салбар архивын асуудал хариуцсан мэргэжилтэн П.Амгаланбаатар нар ажиллав.

Тус хяналт шалгалтаар дүүргийн Архивын тасгийн албан хэрэг хөтлөлт, архивын үйл ажиллагаа болон архив, албан хэрэг хөтлөлтийн талаарх хууль тогтоомжийг харьяа нутаг дэвсгэртээ хэрэгжүүлж, хяналт тавьж байгаа байдалд хяналт шалгалтыг хийж, зөвлөн туслах үйлчилгээг үзүүлсэн юм.

Чингэлтэй дүүргийн Хүүхдийн номын өргөөнд номын санчдыг чадавхижуулах сургалт зохион байгуулагдлаа. Тухайлбал, Хүүхдийн номын өргөө, “World share” ТББ хамтран Чингэлтэй дүүрэгт үйл ажиллагаа явуулдаг номын сангийн албан хаагчдад сургалт явууллаа.

Сургалтаар номын сангуудын өнөөгийн байдал, цаашдын чиг хандлага болоод номын санчдад тулгамдаж буй асуудлуудын талаар санал солилцсон юм.

Сургалтыг Хүүхдийн номын өргөөний захирал, дүүргийн ИТХ-ын төлөөлөгч Б.Болортунгалаг удирдан явууллаа.

Энэ үеэр номын санчдын нийгмийн асуудал, цалин хангамж, сурах бичгийн дарамт, ажиллах болон хүүхдүүдийн ном унших таатай орчин дутагдаж байгаа талаар хэлэлцлээ. Мөн мэдээллийн эрин зуунд уншигчдын өдрөөс өдөрт өсөн нэмэгдэж буй эрэлт хэрэгцээ, нийгэм, эдийн засгийн хөгжил, мэдээлэл технологийн хурдацтай хөгжилтэй уялдуулж Номын сангийн тухай хуулийг сайжруулах чиглэлээр салбарт тулгамдаж буй асуудал, орчин үеийн номын сангийн чиг хандлага, бүх нийтийн уншлагыг дэмжих асуудлыг хэлэлцэж, санал солилцож, бодлогын зөвлөмж гаргаж, дүүргийн удирдлагуудад танилцуулах тал дээр хамтран ажиллахаар тогтлоо.

Чингэлтэй дүүргийн Засаг дарга Н.Батсүмбэрэл хэлэхдээ “Номын сангуудад тулгарч буй төсөв санхүү, орчин нөхцөл, боловсон хүчний асуудлыг шийдэх гарцыг эрэлхийлж байна. Төсөв санхүүгээс болж уншигчдад эрэлт хэрэгцээнд нь нийцсэн номыг бүрдүүлж чадахгүй, номын санчдын нийгмийн асуудлыг шийдвэрлэж чадахгүй байгаа нь үнэн. Гэхдээ дээрх асуудлуудыг шийдвэрлэх тал дээр номын санчидтайгаа зөвлөлдөн ажиллах болно.

Мөн ерөнхий боловсролын сургууль, цэцэрлэгийн эдэлбэр газруудыг судлаад шаардлагатай бол төрд буцааж авна. Тэгээд ногоон байгууламж эсвэл хүүхдийн чөлөөт цагаа өнгөрүүлэх талбай эсвэл олон улсын жишигт нийцсэн номын сан байгуулна” хэмээв.

 

Монгол Улсын Засгийн газрын 2018 оны “Түүхий нүүрс хэрэглэхийг хориглох тухай” 62, 2022 оны 223 дугаар тогтоол, Чингэлтэй дүүргийн Засаг даргын 2022 оны 11 дүгээр сарын 09-ний өдрийн А/341 дугаар захирамж батлагдсан. Уг захирамжийн хүрээнд Чингэлтэй дүүргийн 7-20 болон 24 дүгээр хорооны ерөнхий боловсролын сургуулийн ахлах ангийн сурагчдад “Угаарын хийн хордлогоос урьдчилан сэргийлэх” сургалтыг зохион байгуулж байна. Өнөөдөр нийслэлийн ерөнхий боловсролын 117 болон 37 дугаар сургуулийн сурагчид хамрагдлаа.

Нийслэлийн Агаар, орчны бохирдолтой тэмцэх газар, Чингэлтэй дүүргийн Засаг даргын Тамгын газар, дүүргийн Онцгой байдлын хэлтэс, “Таван толгой түлш” ХХК-тай хамтран зохион байгуулж байгаа уг сургалт өнөөдрөөс буюу 2022 оны 11 дүгээр сарын 29-ний өдрөөс 12 дугаар сарын 02-ны өдөр хүртэл үргэлжлэх юм.

Дэлхийн 180 гаруй улс жил бүрийн арваннэгдүгээр сарын 25-наас арванхоёрдугаар сарын 10-ны өдрүүдэд “Жендэрт суурилсан хүчирхийлэлтэй тэмцэх 16 хоногийн аян”-ыг нэгдмэл зорилго, нэг уриан дор тэмдэглэн өнгөрүүлдэг.

Энэ жил “Жендэрт суурилсан хүчирхийлэлтэй тэмцэх 16 хоногийн аян”-ыг “Нандин бүхнээ хамгаалъя: Өөрийгөө, гэр бүлээ, орчин тойрноо” гэсэн уриан дор зохион байгуулж байна.

Эмэгтэй, эрэгтэй хүмүүсийг өөр өөрийн амьдралдаа эзэн болж, улам сайн сайхан амьдрахын төлөө эерэг арга замыг сонгож, бие биедээ ижил тэгш, хүндлэлтэй хандахыг уриалж буй тус аянд НИТХ, НЗДТГ болон нийслэлийн нутгийн захиргааны байгууллагууд нэгдэж байгаа юм.