Иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, явган хүний зам, талбайн хүрэлцээ хангамжийг нэмэгдүүлэх, авто замын түгжрэлийг бууруулах, тохижилтын ажил гүйцэтгэх боломжийг бүрдүүлэх зорилгоор Чингэлтэй дүүрэгт газар чөлөөлөлтийн ажил эрчимтэй хийгдэж байна.

Тодруулбал өнөөдөр Чингэлтэй дүүргийн 6 дугаар хороо орон сууцны 52 дугаар байрны урд, хойд талд байрлалтай 13 тоосгон авто гараашийг буулгаж, газар чөлөөлөх ажлыг дүүргийн Газар зохион байгуулалтын алба зохион байгуулан ажиллаж байна.

Газрыг чөлөөлсний дараа оршин суугчдаас санал авч, тухайн саналыг үндэслэн тохижилт бүтээн байгуулалтын ажил хийх юм.

Хөдөлмөрийн тухай хуулийн 16.1.6 дахь заалт, Хөдөлмөр нийгмийн түншлэлийн гурван талт үндэсний хорооны 2022 оны 5 дугаар тогтоолоор батлагдсан “Сум, дүүргийн хөдөлмөрийн эрхийн маргаан зохицуулах гурван талт хорооны дүрэм”-ийн 2.6 дахь хэсэгт заасны дагуу Чингэлтэй дүүрэгт Хөдөлмөрийн эрхийн маргаан зохицуулах гурван талт хороо байгуулагдсан.

Дүүргийн Хөдөлмөрийн эрхийн маргаан зохицуулах гурван талт хороо өнөөдөр ээлжит хурлаа хуралдуулж таван иргэний асуудлыг хэлэлцэн, холбогдох шийдвэрийг гаргалаа.

Хөдөлмөрийн эрхийн маргаан зохицуулах гурван талт хороо нь хөдөлмөрийн маргаанаас урьдчилан сэргийлэх, шүүхийн өмнөх шатанд эвлэрүүлэн зуучлах үүрэгтэй бөгөөд долоо хоног бүр хуваарийн дагуу хуралдаж, хүсэлт ирүүлсэн иргэдийн асуудлыг хуулийн хугацаанд хэлэлцэн шийдвэрлэж байна.

Чингэлтэй дүүргийн Засаг дарга Н.Батсүмбэрэл дүүргийн 6 дугаар хорооны 23, 44 дүгээр байрны дунд хийгдэж буй бичил цэцэрлэгийн засвар шинэчлэлт, 3х3 сагсан бөмбөгийн талбайн ажлын явцтай танилцлаа.

Дүүргийн хэмжээнд 7 байршилд 3х3 сагсан бөмбөгийн талбай байгуулах төлөвлөгөө, байршлыг тогтоож, гүйцэтгэлийн ажлууд хийж байгаа билээ. Дүүргийн 6 дугаар хорооны бичил цэцэрлэг, 3х3 сагсан бөмбөгийн засвар шинэчлэлтийн ажлыг Чингэлтэй хөрөнгө оруулалт, бүтээн байгуулалтыг дэмжих төв хэрэгжүүлэн ажиллаж байгаа юм.

Дараах 7 байршилд 2023 онд хийж гүйцэтгэх сагсан бөмбөгийн 3x3 талбайн байршлууд болон талбайн гүйцэтгэлийн ажлыг танилцуулъя.

             6-р хороо 23, 44 дүгээр байрны дунд Засвар шинэчлэлийн ажил

             10-р хороо Чингэлтэйн 14-р гудамжны нийтийн эзэмшлийн талбайд Тохижилтын ажил

             11-р хороо 57-р сургуулийн хөлбөмбөгийн талбайн хажууд Хуучин талбайг шинэчлэх ажил

             13-р хороо сургуулийн 9-р гудамжны нийтийн эзэмшлийн талбайд Тохижилтын ажил

             16-р хороо 139-р сургуулийн ур талд Тохижилтын ажил

             16-р хороо “Хоймор хайрхан” ОНӨТҮГ гадна талбайд Тохижилтын ажил

             18-р хороо 37-р дугаар сургуулийн хөлбөмбөгийн талбайн хажууд Тохижуулах ажлууд тус тус хийгдэж байна.

Дээрх  3х3 сагсан бөмбөгийн талбайн засвар шинэчлэлт, гүйцэтгэлийн ажлын явцтай Засаг дарга Н.Батсүмбэрэл үе үе танилцаж, чанарт стандартыг хангуулах тал дээр анхаарч ажиллахаа мэдэгдэв.

Ерөнхий боловсролын сургуулиудын хөлбөмбөгийн талбайг сэргээн засварлах ажлыг Чингэлтэй дүүргийн зүгээс үе шаттай хэрэгжүүлж байна. Дүүргийн Засаг дарга Н.Батсүмбэрэл өчигдөр буюу 2023 оны 05 дугаар сарын 09-ний өдөр Нийслэлийн Чингэлтэй дүүргийн 57 дугаар сургуулийн хөлбөмбөгийн талбайг сэргээн засварлах ажлын явцтай танилцлаа.

Уг хөлбөмбөгийн талбай хуучирч муудсаны улмаас стандартын шаардлагад нийцэхгүй хэмжээнд хүрээд байсан юм.

Тус талбайг олон улсын жишигт нийцсэн орчин үеийн стандартаар дахин засварлан тохижуулж байгаа бөгөөд хөлбөмбөгийн талбайн хажууд 3х3 сагсан бөмбөгийн талбай болон иргэдийн амралт чөлөөт цагийг ая тухтай өнгөрүүлэх орчныг бүрдүүлэх тохижилтын ажил явагдаж байна.

Тохижилтын ажлыг “Чингэлтэй дүүргийн Тохижилт үйлчилгээний газар” хариуцан хийж байгаа бөгөөд Олон улсын хүүхдийн эрхийг хамгаалах өдрийн өмнө дуусган хүлээлгэн өгөхөөр шамдаж байна.

Чингэлтэй дүүргийн Засаг даргын Тамгын газрын ажилтан, албан хаагчид шинэ долоо хоногийн ажлаа ээлжит “Мэдээллийн цаг”-аараа эхэллээ.

Өнөөдрийн “Мэдээллийн цаг”-аар Чингэлтэй дүүргийн Онцгой байдлын хэлтсээс мэдээлэл өглөө.

Дүүргийн Онцгой байдлын хэлтсийн орлогч, гамшгаас хамгаалах төлөвлөлт, бэлэн байдал хариуцсан ахлах мэргэжилтэн, ахлах байцаагч Б.Амандых “Гамшгаас хамгаалах тогтолцоо, гамшгийн үед ашиглах түр орон байрны бэлэн байдал, тавигдах шаардлага” сэдвээр албан хаагчдад сургалт орлоо.

Дүүргийн ажилтан, албан хаагчдад чиглэсэн “Мэдээллийн цаг” арга хэмжээ нь 14 хоногт нэг удаа тогтмол зохион байгуулагддаг бөгөөд албан хаагчдын мэдлэг, ур чадварыг дээшлүүлэх, сургаж хөгжүүлэх, ёс зүйг мөрдүүлж, харилцаа хандлагыг сайжруулах зорилготой юм.

Чингэлтэй дүүргийн Засаг дарга Н.Батсүмбэрэл сурагчдын ая тухтай орчинд боловсрол эзэмшүүлэх, багш ажилтнуудын ажиллах орчин нөхцөлийг сайжруулах зорилгоор дүүргийн Ерөнхий боловсролын 61 дүгээр сургуулийн урлаг заалны бүтэн урсгал засварын ажлын явцтай танилцаж ажиллаж байна.

Тодруулбал дүүргийн Ерөнхий боловсролын 61 дүгээр сургуулийн урлаг заал нь хуучирч муудсан, зай талбай жижиг, бүжгийн бэлтгэлийн байргүй гээд сурагчдад хүндрэл үүсдэг байсан юм. Үүнийг дүүргийн төсвийн хөрөнгө оруулалтаар шийдэж урлаг заалны засварын ажлыг эхлүүлэв.

Урлаг заалны засварын ажлыг “Гегатера Тех” ХХК хийж гүйцэтгэж байгаа бөгөөд захиалагчийн хяналтын ажлыг  Чингэлтэй хөрөнгө оруулалт, бүтээн байгуулалтыг дэмжих төв хэрэгжүүлэн ажиллаж байгаа юм. Тухайлбал  251 мк зай талбайд бүжгийн бэлтгэлийн тэнхим, багш сурагчдын өрөө, агуулах, 150 хүний суудалтай урлаг заал бий болж байгаа юм.

Засаг дарга Н.Батсүмбэрэл ажлын гэрээнд заасан хугацаанд чанартай гүйцэтгэх, тайз болон лед дэлгэцийн байрлалыг өөрчлөх, засаж залруулах ажлын үүрэг чиглэлийг өглөө.