Чингэлтэй дүүргийн Засаг дарга Н.Батсүмбэрэл өнөөдөр дүүргийн Онцгой комисст үүрэг гүйцэтгэн ажиллаж байсан зарим гишүүдийг хүлээн авч уулзлаа.

Коронавирус (Ковид-19)-ын цар тахлаас урьдчилан сэргийлэх, тандалт хариу арга хэмжээний зохион байгуулалтад дүүргийн Онцгой комиссын гишүүд, албан хаагчид гар бие дайчлан оролцсон юм.

Засаг дарга Н.Батсүмбэрэл дүүргийн 30 жилийн ойн хүндэт медалийг үүрэг гүйцэтгэн ажиллаж байсан гишүүдэд гардуулан өгч, цаашдын ажилд нь амжилт хүслээ.

Хөдөлмөрийн тухай хуулийн 16.1.6 дахь заалт, Хөдөлмөр нийгмийн түншлэлийн гурван талт үндэсний хорооны 2022 оны 05 дугаар тогтоолоор батлагдсан “Сум, дүүргийн хөдөлмөрийн эрхийн маргаан зохицуулах гурван талт хорооны дүрэм”-ийн 2.6 дахь хэсэгт заасны дагуу Чингэлтэй дүүрэгт Хөдөлмөрийн эрхийн маргаан зохицуулах гурван талт хороо байгуулагдсан.

Дүүргийн Хөдөлмөрийн эрхийн маргаан зохицуулах гурван талт хороо өнөөдөр ээлжит хурлаа хуралдуулж, нэг иргэний асуудлыг хэлэлцэн, холбогдох шийдвэрийг гаргалаа. Хөдөлмөрийн эрхийн маргаан зохицуулах гурван талт хороо нь Хөдөлмөрийн маргаанаас урьдчилан сэргийлэх, шүүхийн өмнөх шатанд эвлэрүүлэн зуучлах үүрэгтэй бөгөөд долоо хоног бүр хуваарийн дагуу хуралдаж, хүсэлт ирүүлсэн иргэдийн асуудлыг хуулийн хугацаанд хэлэлцэн шийдвэрлэж байна.

 Монгол Улсын Ерөнхийлөгчийн санаачилсан “Эрүүл Монгол Хүн” үндэсний хөдөлгөөн, Монгол Улсын Ерөнхийлөгчийн Тамгын Газар, ЭМЯ, БНСУ-ын “Ногоон эмнэлэг”-тэй байгуулсан “Хүүхдийн эрүүл мэндийг дэмжих төсөл”-тэй хамтран ажиллах санамж бичгийн хүрээнд БНСУ-ын эмч, эмнэлгийн мэргэжилтнүүд Чингэлтэй дүүрэгт ажиллаж байна.

Чингэлтэй дүүргийн “Хүүхдийн эрүүл мэндийг дэмжих эмнэлгийн тусламж үйлчилгээ”-г хэрэгжүүлэх үйл ажиллагаанд Эрүүл мэндийн сайд С.Чинзориг, Ерөнхийлөгчийн Тамгын газрын Эрүүл мэнд хөгжил төлөвлөлтийн хэлтсийн албаны дарга О.Чимэдсүрэн, Чингэлтэй дүүргийн Засаг даргын Тамгын газрын дарга П.Баянбаатар, БНСУ-ын Үндэсний Ассамблейн дэд дарга Ким Юн Жү, БНСУ-ын Үндэсний Ассамблейн дэд даргын ахлах зөвлөх Мюн Со Жунг болон албаны хүмүүс оролцлоо.

Дүүргийн 12, 21 дүгээр хорооны “Шэжид дүг” өрхийн эрүүл мэндийн төвд БНСУ-ын Ногоон эмнэлгийн эмч нар энэ сарын 16-ныг дуустал хүүхдүүдэд эрүүл мэндийн урьдчилан сэргийлэх үзлэг, шинжилгээг хийх юм.

Чингэлтэй дүүргийн Засаг даргын Тамгын газрын Хэлтсийн дарга нарын шуурхай хурал өнөөдөр буюу зургаадугаар сарын 12-ны өдрийн даваа гарагт уламжлал ёсоор боллоо.

Хуралдааныг дүүргийн Засаг даргын Тамгын газрын дарга П.Баянбаатар удирдан явуулж, хэлтсийн дарга нарт ажлын үүрэг чиглэл өглөө. Тухайлбал, өнгөрсөн долоо хоногт өгсөн үүрэг даалгавруудын биелэлтийг хангаж ажиллах, байгууллага, албан хаагчийн гүйцэтгэлийн төлөвлөгөөний хэрэгжилтийг хангах, албан бичиг, өргөдөл, гомдлын шийдвэрлэлтэд анхаарч ажиллах зэрэг үүрэг даалгаврыг өгөв.