Өнөөдөр Нийслэлийн Чингэлтэй Дүүргийн Засаг Даргын Тамгын Газар, НҮБ-ын Хөгжлийн хөтөлбөр агаарын бохирдлыг бууруулж, гэр хорооллын айл өрхүүдийн сэргээгдэх эрчим хүчний хэрэглээг нэмэгдүүлэх хүрээнд Хамтын ажиллагааны санамж бичиг байгууллаа. 

Чингэлтэй дүүргийн Засаг дарга Н.Мандуул, НҮБ-ын Хөгжлийн хөтөлбөрийн Суурин төлөөлөгч Матилда Димовска нар Хамтын ажиллагааны санамж бичигт гарын үсэг зуран, баталгаажуулав. Санамж бичгийн хүрээнд Улаанбаатар хот, НҮБ-ын Хөгжлийн хөтөлбөрийн тэгш, хүртээмжтэй эрчим хүчний шилжилтийг дэмжих, иргэдийн уур амьсгалын өөрчлөлтийг даван туулах, дасан зохицох чадварыг бэхжүүлж тэдний амьжиргааг дэмжихэд чиглэсэн хамтын ажиллагааг улам бэхжүүлэх юм.

Тэр дундаа “Нүүрснээс нарны эрчим хүчинд” чиглэсэн шилжилтийг дэмжих санаачилгыг хэрэгжүүлж, гэр хороолол дахь айл өрхүүдэд сэргээгдэх эрчим хүчинд түшиглэсэн халаалтын шийдлийг хэрэгжүүлэх замаар нүүрсний хэрэглээг бууруулах юм. Эхний шатанд Чингэлтэй дүүргийн 100 хүртэлх айл өрхөд нарны эрчим хүчинд түшиглэсэн халаалтын шийдлийг нэвтрүүлэх ба урт хугацаандаа агаарын бохирдлыг бууруулж, ногоон ажлын байрыг бий болгон, Улаанбаатар хотын иргэдэд амьдрах эрүүл орчныг бий болгохоор зорьж байна. 

Мөн түүнчлэн, хамтын ажиллагааны хүрээнд иргэд төдийгүй байгууллагуудад хүлэмжийн хийн ялгарлаа бууруулах чухал хөшүүрэг болох нүүрстөрөгчийн зах зээлийн үндэсний тогтолцоо, зохицуулалтыг боловсруулах чиглэлд анхааран ажиллах юм. 

Чингэлтэй дүүргийн Засаг дарга Н.Мандуул уг санаачилгын эерэг боломжуудыг онцолж хэлэхдээ “НҮБХХ-тэй хамтран ажиллаж байгаа нь Улаанбаатар хотын тулгамдсан асуудлын нэг болох гэр хорооллын агаарын бохирдлын асуудлыг шийдвэрлэхэд чухал нэмэртэй үйл явдал болж байна. Энэхүү хамтын ажиллагаа нь Чингэлтэй дүүргийн айл өрхүүдэд бодит шийдлүүдийг авчирч, бохирдлыг бууруулж, байгаль орчин болон манай оршин суугчдад ашигтай цэвэр эрчим хүчний сонголтуудыг бий болгож байна.” гэдгийг дурдлаа.

НҮБ-ын Хөгжлийн хөтөлбөрийн Суурин төлөөлөгч Матилда Димовска энэхүү хамтын ажиллагаа нь НҮБ-ын Хөгжлийн хөтөлбөрийн Тэгш, хүртээмжтэй эрчим хүчний шилжилтийн тухай эмхлэн гаргасан “Хүний хөгжлийн үндэсний баримт бичиг”-ийн гол агуулга зөвлөмжүүдтэй уялдаж байгааг онцоллоо. Мөн тэрээр "Энэ хамтын ажиллагаа нь Улаанбаатар хот болон Монгол Улсын хэмжээнд тэгш, хүртээмжтэй эрчим хүчний шилжилтийг хийхэд дэмжлэг үзүүлэх бодит алхам юм. Чингэлтэй дүүргийн айл өрхүүдэд нарны эрчим хүчийг ашиглах шийдлийг нэвтрүүлснээр бид агаарын бохирдлыг бууруулаад зогсохгүй, хүн бүрд илүү тэгш, хүртээмжтэй ирээдүйг цогцлоох боломжтой" гэлээ.

Хамтын ажиллагааны хүрээнд НҮБ-ын Хөгжлийн хөтөлбөр нь техникийн туршлага, сургалт явуулах бол дүүргийн засаг захиргаа санхүүжилтийг гаргаж, төсөлд хамрагдах өрх болон байршлуудыг тодорхойлж, системийн засвар үйлчилгээг хариуцах юм. Энэхүү хамтын ажиллагаа нь Чингэлтэй дүүрэг төдийгүй Улаанбаатар хотыг бүхэлд нь цэвэр, ногоон ирээдүй рүү чиглүүлэх чухал алхам юм.

Монгол Улсад Орчин цагийн Архивын салбар үүсэж хөгжсөний 97 жилийн ой, “АРХИВЧДЫН ӨДӨР”-ийг тохиолдуулан Иргэдийн төлөөлөгчдийн хурал, Засаг даргын харьяа 106 байгууллагын удирдлага, Архив, албан хэрэг хөтлөлт хариуцсан албан хаагчдад Архив, албан хэрэг хөтлөлтийн талаар төрөөс баримтлах бодлого, хууль тогтоомжийг таниулах, арга зүйгээр хангах, мэдлэг чадварыг дээшлүүлэх олон талт арга хэмжээг зохион байгуулж байна.

Энэ хүрээнд Чингэлтэй дүүргийн Засаг даргын Тамгын газрын Архивын хэлтсээс дэргэдэх газар, хэлтэс, алба, хороо, сургууль, цэцэрлэгүүдэд шинээр томилогдсон Архив, албан хэрэг хөтлөлт хариуцсан албан хаагчдад 2024 оны 11 дүгээр сарын 08-ны өдөр "Архив, албан хэрэг хөтлөлтийн талаар гарсан хууль, журам, стандарт, нэгдсэн системийн ашиглалт,  анхаарах асуудлууд" сэдвээр нэгдсэн сургалтыг зохион байгууллаа.

Нийслэлийн Чингэлтэй дүүрэг, Япон улсын Шизоука мужийн Яйзү хот хооронд байгуулсан хамтын ажиллагааны Санамж бичгийн хүрээнд ирэх онд хоёр талын хамтран хэрэгжүүлэх ажлын төлөвлөгөөг хэлэлцэх Цахим уулзалтыг өнөөдөр зохион байгууллаа.

Уулзалтад Япон улсын Шизоука мужийн Яйзү хотын Хамтын ажиллагааны газрын зөвлөх Мацунага, Хамтын ажиллагааны хэлтсийн дарга Ивата, Тасгийн дарга Ито, Олон Улсын харилцааны мэргэжилтэн Б.Янжинлхам, Чингэлтэй дүүргийн Засаг даргын орлогч З.Бямбажав, Засаг даргын Тамгын газрын дарга Ж.Лхагвасүрэн болон холбогдох хэлтсийн удирдлагууд оролцлоо.

Чингэлтэй дүүрэг Яйзү хоттой 2018 оноос хойш боловсрол, соёл урлаг, спортын чиглэлээр хамтран ажиллаж байгаа бөгөөд цаашид хоёр дүүрэг боловсрол, соёл урлаг, эрүүл мэнд, спортын чиглэлээр хамтын ажиллагаагаа шинэ шатанд гаргаж, илүү олон салбарт хамтран ажиллах талаар санал солилцсон юм.

Дүүргийн хүн амд эрүүл мэндийн тусламж, үйлчилгээний чанар хүртээмжийг сайжруулах, хойд бүсийн хороодын иргэдэд эрүүл мэндийн үйлчилгээг цаг алдалгүй үзүүлэх ажлын хүрээнд дүүргийн 13 дугаар хороонд “Хайлааст амбулатори”, 14 дүгээр хороонд “Эрт илрүүлэг оношилгооны төв”-ийн барилгын ажил явагдаж байна.

Үүнээс “Эрт илрүүлэг оношилгооны төв”-ийн барилгын ажил 90 хувьтай явж байгаа бөгөөд энэ онд багтаан ашиглалтад оруулахаар ажиллаж байна.

 Харин “Хайлааст амбулатор”-ийн барилга 2018 оноос хойш хэрэгжиж эхэлсэн ч гүйцэтгэгч компаниас шалтгаалж ажлын явц удаашралтай, гүйцэтгэл дутуу явж байгаа юм.

Тухайн асуудлаар Чингэлтэй дүүргийн Засаг дарга Н.Мандуул гүйцэтгэгч компанийн төлөөлөлтэй уулзаж, хэдэн жил дамнаж царцсан байдлыг тодруулж, барилгыг гэрээний хугацаанд багтаан стандарт, нормд нийцүүлэн чанартай гүйцэтгэх, гүйцэтгэлийн явцад тогтмол хяналт тавьж ажиллахыг гүйцэтгэгч тал болон дүүргийн Эрүүл мэндийн төвийн удирдлагуудад тус тус үүрэг болголоо.

Дүүргийн нутаг дэвсгэрт үйл ажиллагаа эрхэлж буй иргэн, аж ахуйн нэгжүүдэд 2025 оны 01 дүгээр сарын 01-ний өдрөөс хэрэгжих “Мах махан бүтээгдэхүүний техникийн зохицуулалт”, “Хүнсний аюулгүй байдал, эрүүл ахуйн зохистой дадал, хүнсний түүхий эд бүтээгдэхүүний сонголт” чиглэлээр Нийслэлийн мал эмнэлгийн газар болон Нийслэлийн Хүнс, хөдөө аж ахуйн газартай хамтран сургалт хэлэлцүүлгийг зохион байгуулан ажиллалаа.

Сургалтад худалдаа, хоол үйлдвэрлэл, хүнсний үйлдвэрийн чиглэлээр үйл ажиллагаа эрхэлдэг 120 иргэн, аж ахуйн нэгжүүд хамрагдлаа.

Чингэлтэй дүүргийн Засаг дарга Н.Мандуул гэр хорооллын нүүрсний хэрэглээг сэргээгдэх эрчим хүчний хэрэглээгээр солих, нэмэгдүүлэх талаар НҮБ-ын Хөгжлийн хөтөлбөрийн олон улсын зөвлөх болон мэргэжилтнүүдтэй уулзалт хийлээ.

Уулзалтаар НҮБ-ын Хөгжлийн хөтөлбөрийн зүгээс Улаанбаатар хот, Байгаль орчин, уур амьсгалын өөрчлөлтийн яам хамтран Франц улсын Засгийн газрын санхүүжилтээр хэрэгжүүлж буй “Гэр хороололд сэргээгдэх эрчим хүчний шилжилтийг дэмжих замаар амьжиргааг нэмэгдүүлэх” төслийн үргэлжлэл болгож ирэх онд Чингэлтэй дүүргийн 100 өрхөд сэргээгдэх эрчим хүчний хэрэглээг суулгах ажлыг зохион байгуулж ажиллахаар боллоо.

Сэргээгдэх эрчим хүч буюу нарны эрчим хүчний эх үүсвэрт шилжүүлснээр, тухайн айлуудын зуухны хэрэглээг халж дулааны хуримтлууртай цахилгаан халаагуур нэвтрүүлснээр хүлэмжийн хийг бууруулж, уур амьсгалын өөрчлөлт болон агаарын бохирдолтой тэмцэхэд хувь нэмрээ оруулж байгаа гэсэн үг юм.

✅Чингэлтэй дүүргийн Засаг дарга Н.Мандуул болон холбогдох албаны хүмүүс дүүргийн Эрүүл мэндийн төвийн өргөтгөлийн барилгыг гүйцэтгэж буй “Солармед” компанийн төлөөлөлтэй уулзан ажлын явцын талаар мэдээлэл авлаа.

Дүүргийн Эрүүл мэндийн төвийн өргөтгөлийн барилга 60 хувьтай явж байна. Тус барилгын ажлыг барьж байгаа гүйцэтгэгч компанийн зүгээс барилгын гадна талбайн шугам сүлжээний ажил, тоног төхөөрөмж болон барилгын газардуулга хийхэд хүндрэл учирч байгааг уулзалтын үеэр хэллээ.

Засаг дарга Н.Мандуул барилга баригдаж буй хэсгийн гадна зам талбайн шугам сүлжээ, цахилгааны газардуулгатай холбоотой асуудлыг холбогдох байгууллагуудтай хамтран уулзалт зохион байгуулж түргэн хугацаанд шийдэж ажиллахаа илэрхийллээ.

✅Чингэлтэй дүүргийн Засаг даргын орлогч З.Бямбажав дүүргийн 17, 24 дүгээр хорооны цогцолбор байрны барилгын ажлын явцыг шалгаж, газар дээр нь ажиллалаа.

Иргэдэд үзүүлэх төрийн үйлчилгээг хүртээмжтэй, хороодын ачааллыг тэнцвэржүүлэх үүднээс дүүргийн 4, 17, 21, 22, 24, дүгээр хороодод шинээр цогцолбор барилга барьж байгаа билээ. Энэ хүрээнд 17, 24 дүгээр хорооны цогцолбор байрыг энэ онд ашиглалтад оруулахаар ажиллаж байна. Тухайн хороодын цогцолбор байр ашиглалтад орсноор цагдаагийн хэсэг, өрхийн эмнэлэг зэрэг төрийн үйлчилгээг тав тухтай нэг цэгээс чирэгдэлгүй хүлээн авах нөхцөл боломж бүрдэж байгаа юм.

✅Чингэлтэй дүүргийн Засаг дарга Н.Мандуул өнөөдөр дүүргийн 2 дугаар хороо, Бөмбөгөр худалдааны төвийн урд байрлах, нийтийн эзэмшлийн гудамжинд үйл ажиллагаа явуулах зөвшөөрөлгүй объектыг нүүлгэх ажлыг зохион байгуулан газар дээр нь ажиллалаа.

Иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, явган хүний зам, нийтийн эзэмшлийн гудамж, зам талбайн хүрэлцээ хангамжийг нэмэгдүүлэх зорилгоор Чингэлтэй дүүргийн нутаг дэвсгэрт зөвшөөрөлгүй, эзэмшигч нь тодорхойгүй объектуудыг нүүлгэж, газрыг чөлөөлөх ажлыг үргэлжлүүлэн зохион байгуулах болно.

Нийтийн эзэмшлийн гудамж, зам талбайд үйл ажиллагаа явуулах зөвшөөрөлгүй, эзэмшигч нь тодорхойгүй, тухайн нэг байршилд удаан хугацаагаар орхигдсон, хотын өнгө үзэмжид сөргөөр нөлөөлсөн объектуудыг зөөвөрлөн шилжүүлэх ажлыг эхлүүлж байна.

Тодруулбал өнөөдөр Чингэлтэй дүүргийн Засаг дарга Н.Мандуул дүүргийн 19 дүгээр хороо, “Шадивлан” зуслангийн зам дагуу байрлуулсан үйл ажиллагаа явуулах зөвшөөрөлгүй, хуучирч муудсан автобусыг албадан нүүлгэх ажлыг хийлгэн газар дээр нь ажиллалаа.

"Цаашид үе шаттайгаар дүүргийн хэмжээнд зөвшөөрөлгүй, эзэмшигч нь тодорхойгүй объектуудыг нүүлгэж, газрыг чөлөөлж" ажиллахаа Засаг дарга Н.Мандуул хэллээ.

Дэлхийн 90 гаруй улс, 350 гаруй хотыг нэгтгэсэн “Юнеско”-гийн “Бүтээлч хотуудын сүлжээ”-нд нийслэл Улаанбаатар хот нэгдэн орсонтой холбогдуулан, Монгол Улсын нийслэл Улаанбаатар хот үүсэн байгуулагдсаны 385 жилийн ойн хүрээнд нийслэлийн 9 дүүрэг, 203 хороо, соёлын бүтээлч үйлдвэрлэл эрхлэгч аж ахуйн нэгж, иргэдийн дунд зохион байгуулсан “Бүтээл хот” уралдаанд оролцож, “ШИЛДЭГ ДҮҮРЭГ”-ээр шалгарлаа.

Нийслэлээс зохион байгуулж буй “Бүтээлч хот” уралдаан нь соёлын бүтээлч үйлдвэрлэлийг хөгжүүлэх, дэмжих зорилгоор нийслэлийн дүүрэг, хороо, соёлын бүтээлч үйлдвэрлэл эрхлэгч аж ахуй нэгж, иргэдийн үйл ажиллагаа, амжилтыг олон нийтэд сурталчлан таниулж, урамшуулахад чиглэсэн юм.

Чингэлтэй дүүрэг, бүтээлч хотуудын сүлжээний үйл ажиллагааны 7 төрлийг дүүргийн хэмжээнд хөгжүүлэхэд 2024 онд төсвийн дэмжлэг үзүүлсэн байдал, зохион байгуулсан үйл ажиллагаа, хэрэгжүүлсэн төсөл, хөтөлбөрийн хүрээнд шалгуур үзүүлэлтийг ханган ажиллалаа. 

✅Чингэлтэй дүүргийн Засаг дарга Н.Мандуул, Засаг даргын Тамгын газрын ажилтан, албан хаагчидтай уулзаж, цаг үеийн нөхцөл байдалтай холбоотой дүүрэгт хийгдэж буй үйл ажиллагааны талаар танилцуулж, холбогдох үүрэг чиглэлийг өгч ажиллалаа.

Ажилтан, албан хаагчид ажлын цаг ашиглалтад анхаарах, ажлын байран дахь албан ёсны хувцаслалтыг мөрдөх, иргэдээс ирсэн өргөдөл, гомдол, хүсэлтыг цаг тухайд нь шийдвэрлэж байхыг хэллээ. Мөн дүүргийн гудамж, зам талбайн тохижилтын ажил, бүтээн байгуулалтын ажлуудад хяналт тавьж ажиллахыг холбогдох хэлтсүүдэд үүрэг болголоо.