Монгол Улсын Сонгуулийн ерөнхий хорооноос НҮБ-ын Хөгжлийн хөтөлбөртэй хамтран хэрэгжүүлж буй “Шийдвэр гаргах түвшинд жендэрийн тэгш байдал, эмэгтэйчүүдийн оролцоог дэмжих нь” төслийн хүрээнд Чингэлтэй дүүргийн Ерөнхий боловсролын 39, 57 дугаар сургуулийн ахлах ангийн сурагчдад 2023 оны 09 дүгээр сарын 28, 29-ны өдрүүдэд сургалтыг явууллаа.

Сургалтын гол зорилго нь сонгууль, сонгуулийн хууль тогтоомжийн талаар мэдлэг олгох, сонгох, сонгогдох эрхээ хэрэгжүүлэхийн ач холбогдлыг ойлгуулах замаар улс төрийн боловсрол олгож, тэдний идэвх оролцоог нэмэгдүүлэх, жендэрийн талаарх хэвшмэл буруу ойлголтыг өөрчилж, зөв ойлголттой, мэдрэмжтэй болгоход оршиж байгаа юм.

Цаашид Чингэлтэй дүүргийн Ерөнхий боловсролын 17, 61 дүгээр сургуулийн ахлах ангийн сурагчдад хоёр өдрийн сургалтыг явуулахаар төлөвлөж байна.

Жил бүрийн 10 дугаар сарын 1-ний өдрийг 1992 онд Монголын Ахмадын өдөр болгосон түүхтэй. Энэ өдрийг дэлхий нийтээрээ 33 дахь жилдээ, Монгол Улсын хэмжээнд 31 дэх жилдээ тэмдэглэж байна.

Олон улсын ахмадын өдрийг тохиолдуулан Чингэлтэй дүүргийн Засаг даргын Тамгын газрын удирдлагууд өнөөдөр Засаг даргын Тамгын газарт ажиллаж байгаад гавьяаныхаа амралтанд гарсан үе үеийн ахмадуудаа хүлээн авч уулзлаа. Өнөөдрийн арга хэмжээнд Чингэлтэй дүүргийн анхны Засаг дарга А.Зул тэргүүтэй 59 ахмад хүрэлцэн ирсэн бөгөөд Засаг даргын зөвлөх Ч.Болормаа, Засаг даргын Тамгын газрын дарга П.Баянбаатар нар хүлээн авч уулзан, дүүргийн хэмжээнд сүүлийн жилүүдэд хийж хэрэгжүүлж байгаа ажлаа танилцуулан, үг сургаалийг нь сонсон хүндэтгэл үзүүллээ.

"Гамшгийн эрсдэлийг бууруулах олон улсын өдөр"-ийг угтаж Дүүргийн засаг даргын нэрэмжит “Өсвөрийн аврагч-2023” тэмцээнийг ерөнхий боловсролын сургуулиудын дунд зохион байгууллаа.

Тэмцээнийг дүүргийн Боловсролын хэлтэс, Гэр бүл, хүүхэд, залуучуудын хөгжлийн хэлтэс, Улаан загалмай хороотой хамтран зохион байгуулсан бөгөөд 12 сургуулийн 84 сурагч багийн жагсаалын үзүүлэх тоглолт, мэдлэг сорих асуулт, хариулт, усанд осолдогчийг аврах, эмнэлгийн анхан шатны тусламж үзүүлэх, хүч, авхаалж самбаа сорих, химийн хордолтын цэг, гал унтраах цэг зэрэг төрлүүдээр Хайрхан хөгжлийн төвийн хөл бөмбөгийн талбайд өрсөлдөн шилдгүүдээ тодрууллаа.

Тэргүүн байранд дүүргийн Ерөнхий боловсролын 149 дүгээр сургуулийн “Хангарди” баг, шилжин явах цом, алтан медаль, өргөмжлөл, мөнгөн шагнал Дэд байранд дүүргийн Ерөнхий боловсролын 24 дүгээр сургуулийн “Харсүлд” баг, мөнгөн медаль, өргөмжлөл, мөнгөн шагнал Гутгаар байранд дүүргийн Ерөнхий боловсролын 23 дугаар сургуулийн сургуулийг "Элит-23" баг, мөнгөн шагнал Тусгай байранд дүүргийн Ерөнхий боловсролын 50 дугаар сургуулийн “Элит” баг өргөмжлөл, мөнгөн шагнал.

Чингэлтэй дүүргийн Засаг даргын орлогч Л.Цэеэрэгзэн, Санхүү төрийн сангийн дарга Б.Нацагдорж болон бусад холбогдох албаны хүмүүс 17, 19 дүгээр хороодод ажиллалаа.

Тодруулбал дүүргийн 19 дүгээр хорооны нутаг дэвсгэрт байрлах Нийслэлийн Ерөнхий боловсролын 117 дугаар сургуулийн Эцэг эхийн зөвлөлөөс сургуулийн орчны хөдөлгөөний аюулгүй байдал, авто машины зогсоол шийдвэрлүүлэх талаар дүүргийн удирдлагуудад хүсэлт тавьсны дагуу дүүргийн холбогдох албаныхан газар дээр нь очиж ажиллалаа.

ЕБС-ийн 117 дугаар сургуульд 1600 сурагч хоёр ээлжээр суралцдаг бөгөөд нэг ээлжиндээ 800 сурагч суралцдаг юм. Тэдний эцэг эхийн төлөөлөл өглөө, оройдоо хүүхдээ хүргэж авахад автомашины зогсоол хүрэлцдэггүй хүндрэлтэй байдалд хүргэдэг гэдгийг хэллээ.

Түүнчлэн 17 дугаар хороонд цэцэрлэг баригдах газар чөлөөлөлтийн бүсийг сонгох ажлын дагуу хорооны нутаг дэвсгэрийн боломжтой газруудад очиж ажиллалаа.

Нийслэлийн Чингэлтэй дүүрэг 2023 оныг “Үйлдвэрлэлийг дэмжих жил” болгон зарласан. Энэ хүрээнд ахмад үйлдвэрлэгчдийнхээ бараа бүтээгдэхүүний үзэсгэлэн худалдааг Тусгаар тогтнолын талбайд зохион байгууллаа.

“Туршлагаа солилцож хамтдаа хөгжье” уриатай тус арга хэмжээнд Чингэлтэй дүүргийн 24 хорооны 54 ахмад  гараар урласан бүтээгдэхүүнүүд болон дотооддоо тарьж ургуулсан эко хүнсний ногоо, жимсний дээжээ үзэсгэлэн худалдаанд дэлгэж танилцуулсан юм. Үзэсгэлэн худалдааг Чингэлтэй дүүргийн Засаг дарга Н.Батсүмбэрэл, дүүргийн Жижиг, дунд үйлдвэрийг дэмжих төвийн дарга Т.Уламбаяр нар үзэж сонирхон, ахмадуудад өрхийн үйлдвэрлэл эрхлэхэд тулгарч буй хүндрэл болон дүүргийн зүгээс хамтран хэрэгжүүлж болох боломжийн талаар ярилцлаа.

Чингэлтэй дүүргийн Засаг даргын Тамгын газрын Хэлтсийн дарга нарын шуурхай хурал боллоо.

Хуралдааныг дүүргийн Засаг даргын Тамгын газрын дарга П.Баянбаатар, Засаг даргын орлогч Л.Цэеэрэгзэн нар удирдан явуулж, хэлтсийн дарга нарт ажлын үүрэг чиглэл өглөө.

БНСУ-д 2023 оны есдүгээр сарын 16-18-ны өдрүүдэд зохион байгуулагдсан Олон улсын "Самбо" бөхийн тэмцээнд  Чингэлтэй дүүргийн 43 дугаар цэцэрлэгийн эмч Б.Энхзул III байр эзэлж, хүрэл медаль авчээ. Тэрбээр бага насны хүүхдэд эрүүл ахуйн боловсрол, эрүүлжүүлэлт, чийрэгжүүлэлт, зөв дадал хэвшлийг олгож ажилладаг бөгөөд Самбо бөхийн дэлхийн аварга, спортын мастер зэрэгтэй юм.

Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө Япон Улсын “Эрүүл хотуудыг дэмжигч” ТББ-ын ерөнхийлөгч Чиба Мицүюки тэргүүтэй эмч, төлөөлөгчдийг хүлээн авч уулзан, хамтын ажиллагааны талаар санал солилцлоо. Уг төслийн багийнхан нийслэлийн хэмжээнд ерөнхий боловсролын сургуулийн сурагчдын амны хөндийн эрүүл мэндийг дэмжих төсөл хэрэгжүүлэх хүсэлтэй байгаа юм. Тодруулбал, “Эрүүл хотуудыг дэмжигч” ТББ, Чингэлтэй дүүргийн ЗДТГ, ЖАЙКА хамтран нийслэлийн ерөнхий боловсролын 39 болон 50 дугаар сургуульд “Загвар сургуулиудад шүдний үзлэг хийх тогтолцоог нэвтрүүлэх төсөл”-ийг 2022-2025 онд хэрэгжүүлж байна. Төслийн хүрээнд загвар сургуулиудад шүдний үзлэгийн багаж хэрэгсэл, тоног төхөөрөмжийг хүлээлгэн өгч, шүд угаах зориулалтын өрөөг тохижуулаад буй. Түүнчлэн сурагчдад жил бүр урьдчилан сэргийлэх үзлэг хийж байгаа юм.

Төслийн зүгээс 2022 онд хоёр сургуулийн нийт 2406 сурагчид шүдний үзлэг хийхэд өвчлөл 90.8 хувьтай байжээ. Харин энэ жилийн хувьд есдүгээр сарын 11-15-нд дүүргийн Эрүүл мэндийн төвтэй хамтран хоёр сургуулийн 1-12 дугаар ангийн 2141 сурагчид үзлэг хийхэд шүдний цооролтын тархац 95 хувьтай байсан аж. Иймд “Эрүүл хотуудыг дэмжигч” ТББ-ын ерөнхийлөгч Чиба Мицүюки уг төслийн хүрээг тэлж, нийслэлийн хэмжээнд өргөжүүлэх, илүү олон сургуульд хэрэгжүүлэх хүсэлтээ уулзалтын үеэр илэрхийллээ.

Нийслэлийн Засаг даргын орлогч З.Төмөртөмөө төслийн хамт олонд талархал илэрхийлж, “Төслийн баг Нийслэлийн Эрүүл мэндийн газартай хамтран цаашид ямар хэлбэр, зарчмаар ажиллах саналаа нэгтгэж, төлөвлөгөөгөө гарган өгвөл нийслэлийн зүгээс бодлогоор дэмжин ажиллахад бэлэн” хэмээв.

Чингэлтэй дүүргээс Япон улсын Эрүүл хотуудыг дэмжигч ашгийн бус байгууллага болон Японы олон улсын хамтын ажиллагааны байгууллагатай хамтран хэрэгжүүлж буй шүдний эрүүл ахуйн тогтолцоог нэвтрүүлэх төслийн багийн бүрэлдэхүүн дүүрэгт айлчлал хийж буй.

Энэхүү айлчлалынхаа хүрээнд 2023 оны есдүгээр сарын 17-ноос 22-ны хооронд дүүргийн Ерөнхий боловсролын 37, 50 дугаар сургуульд үзлэг  хийж, төслийн явц, үр дүнтэй танилцаж байгаа бөгөөд үүнийхээ дараа цаашдын төлөвлөлтөө хийх юм.

Мөн энэ үеэр дээрх сургуулиудын Эрүүл мэндийн зөвлөлийн гишүүд, багш нарт Шүдний эрүүл ахуйч мэргэжлийн онцлог, ажлын талаар танилцуулж, амны хөндийн эрүүл ахуйн сэдвээр сургалт явуулсан байна.

Чингэлтэй дүүргийн Засаг даргын Тамгын газар, Нийгмийн эрүүл мэндийн үндэсний төвтэй хамтран угаарын хийн архаг хордлогын үеийн тусламж үйлчилгээ, ялган оношлох, олныг хамарсан гамшиг ослын үед эмнэлгийн тусламжийг зохион байгуулах мэдлэг, чадвар эзэмшүүлэх зорилгоор “Химийн бодис, нүүрстөрөгчийн дутуу ислийн хордлогын үеийн тусламж үйлчилгээ” сэдэвт сургалтыг дүүргийн өрхийн эрүүл мэндийн төвийн эмч, сувилагч, хороодын Засаг дарга, хэсгийн ахлагч нарт 2023 оны 09 дүгээр сарын 18-ны өдөр зохион байгууллаа.

Чингэлтэй дүүргийн Улсын бүртгэлийн хэлтэс “Үндэсний номын баяр”-ыг дэмжин ажиллалаа.

"Илүү их уншъя” уриан дор зохион байгуулагддаг "Үндэсний номын баяр”-т Чингэлтэй дүүргийн Улсын бүртгэлийн хэлтэс оролцож, номын баярт оролцсон иргэддээ амралтын өдрүүдэд улсын бүртгэлийн үйлчилгээ авах боломжийг бүрдүүлж ажиллалаа.

Энэ үеэр улсын бүртгэлийн хууль тогтоомж, цахим үйлчилгээний ач холбогдлыг сурталчилж, иргэний, эд хөрөнгийн, хуулийн этгээдийн улсын бүртгэлийн талаар мэдээлэл, зөвлөгөө өгч тоон гарын үсэг олгох, үндэсний цахим гадаад паспорт, иргэний үнэмлэх захиалах зэргээр нийт 288 иргэнд улсын бүртгэлийн үйлчилгээг үзүүлж ажиллажээ.

Чингэлтэй дүүргээс Япон улсын Эрүүл хотуудыг дэмжигч ашгийн бус байгууллага болон Японы олон улсын хамтын ажиллагааны байгууллагатай хамтран хэрэгжүүлж шүдний эрүүл ахуйн тогтолцоог нэвтрүүлэх төслийн багийхан өнөөдөр дүүрэгт айлчиллаа.

Эрүүл хотуудыг дэмжигч ашгийн бус байгууллагын Ерөнхийлөгч, Ичикава хотын шүдний эмч нарын холбооны тэргүүн Чиба Мицүюки тэргүүтэй айлчлалын багийг Чингэлтэй дүүргийн Засаг даргын орлогч Д.Отгонбаатар, ЗДТГ-ын дарга П.Баянбаатар тэргүүтэй албаныхан хүлээн авч уулзлаа.

Хамтын ажиллагааны хүрээнд Чингэлтэй дүүргийн Ерөнхий боловсролын 37, 50 дугаар сургуулиудад хэрэгжүүлж буй төсөл амжилттай хэрэгжиж байгааг Засаг даргын орлогч Д.Отгонбаатар онцлоод, “Манай улсын сурагчдын дунд шүдний өвчлөл эрс нэмэгдэж байгаа нь бидний санааг зовоож байна.

Иймд Эрүүл хотуудыг дэмжигч ашгийн бус байгууллага болон ЖАЙКА-тай хамтарч хэрэгжүүлж байгаа энэхүү төслийн гол зорилго нь Ерөнхий боловсролын сургуулиудад амны хөндийн урьдчилан сэргийлэх тогтолцоог нэвтрүүлэх замаар нийт хүн амын дундах шүдний өвчлөлийг бууруулах юм” гэсэн бол сургуулийн насны хүүхдийн шүдний өвчлөлийг бууруулахад СӨБ-ын насны хүүхдүүдийг шүдээ зөв угаах дадал хэвшилд сургаж, эрт үеийн урьдчилан сэргийлэлтийг хийх нь нэн чухал болохыг төсөл хэрэгжүүлэгч Япон талын зөвлөх эмч нар онцоллоо.