Чингэлтэй дүүрэгт нийслэл, дүүргийн төсөв болон олон улсын байгууллагын санхүүжилтээр томоохон бүтээн байгуулалтын ажлууд явагдсаар байгаа билээ. Тодруулбал дүүргийн 1-6 дугаар хороог “Ногоон бүс” болгох бүтээн байгуулалт, тохижилтын ажил, мөн 9, 10 дугаар хорооны нутаг дэвсгэрт олон улсын жишигт нийцсэн нэгдсэн эмнэлгийн газар чөлөөлөлт, төрийн захиргааны байр, төрөх эмнэлэг барих газар чөлөөлөлт, 1.7 км 4 эгнээ зам зэрэг ажлууд явагдаж байна.

Өнгөрсөн амралтын өдөр Чингэлтэй дүүргийн Засаг дарга Н.Батсүмбэрэл, болон дүүргийн удирдлагууд  дүүргээс сонгогдсон УИХ-ын гишүүн, Монгол Улсын сайд Ж.Сүхбаатар, УИХ-ын гишүүн, Байнгын хорооны дарга М.Оюунчимэг болон бусад албаны хүмүүст дүүргийн Камерын нэгдсэн төв, дэд бүтэц барих, газар чөлөөлөлт зэрэг томоохон ажлуудыг танилцуулав.

Тухайлбал, камерын нэгдсэн төв “Ногоон бүс”-ийн үйл ажиллагааг жигдрүүлснээр дүүргийн хэмжээнд 1, 2, 3, 4, 5, 6  дугаар хороо буюу байшин хороолол иж бүрэн камержуулалттай ногоон бүс болж, гэмт хэргийн тоо 50 хувиар буурах судалгаа гарсан байна. Камерын нэгдсэн төвийн серверийн хүчин чадал, бичлэг хадгалах хугацааг 360 хоног болгосноор гудамж талбайд байрлуулан I-7 стандартын орчин үеийн камерыг суурилуулсан байна.

УИХ-ын гишүүн Ж.Сүхбаатар “Манай дүүрэгт өрнөж буй томоохон төсөл, бүтээн байгуулалтын ажилтай танилцлаа. Энэ дүүргээс сонгогдсон гишүүний хувьд шийдвэрлэх шаардлагатай асуудлуудад дэмжлэг үзүүлж ажиллах”-аа илэрхийлье гэв.

Бүтээн байгуулалттай танилцах ажлын хүрээнд дүүргийн 10 дугаар хороонд Азийн хөгжлийн банкны санхүүжилтаар баригдах олон улсын жишигт нийцсэн нэгдсэн эмнэлгийн газар чөлөөлөлтийн ажлын явцтай албаныхан танилцав. Чингэлтэй дүүрэг өөрийн төсвөөр буюу 6,8 тэрбум төгрөгөөр нийтдээ 2,8 га газрыг бүрэн чөлөөлж дуусгасан. Одоо барилгын зураг төслийг Азийн хөгжлийн банк гаргаж, барилгын компанийн тендерийг зарлах үлдээд байгаа юм.

Дүүргийн 10 дугаар хорооны нутаг дэвсгэр, Дэнжийн мянгын Цагаан байрны уулзвараас Хүчит шонхор захын уулзвар хүртэлх 1.7 км, 4 эгнээ туслах замын өргөтгөлийн ажлыг гүйцэтгэж буй  “Экспресс зам” компаний захирал н.Чинбат  уг замыг 2023 оны 10 дугаар сар гэхэд 7 метрийн өндөртэй 1.7 км 4 эгнээтэйгээр хүлээлгэн өгнө гэв.

Дүүргийн 9 дүгээр хороонд газар чөлөөлөлтийн ажил 60 хувьтай явж байгаа бөгөөд уг газарт дүүргийн Засаг даргын Тамгын газрын байр болон төрөх эмнэлэг баригдах юм.  Төрөх эмнэлэг барих газар чөлөөлөлтийн байдал, төсөв санхүүжилт болон гэр хорооллыг барилгажуулах ажил эрчимтэй хийгдэж буйд УИХ-ын гишүүн М.Оюунчимэг сэтгэл хангалуун байгаагаа илэрхийлэн дэмжиж ажиллана гэдгээ хэллээ. 

 Чингэлтэй дүүрэг төрийн албан хаагчдаа Удирдлагын академиас зохион байгуулсан богино хугацааны сургалтад хамруулав.

Монгол Улсын Засгийн газрын 2022 оны 11-р сарын 30-ны өдрийн 438 дугаар тогтоолын дагуу "Алсын хараа 2050" Монгол Улсын урт хугацааны хөгжлийн бодлогын эхний үе шат "Шинэ сэргэлтийн бодлого"-ыг хэрэгжүүлэх хүрээнд "Хөгжлийн бодлогыг хэрэгжүүлэхэд иргэдийн оролцоог нэмэгдүүлэх нь" богино хугацааны сургалтад дүүргийн Засаг даргын Тамгын газар, Засаг даргын дэргэдэх хэлтэс, албад, 1-24 дүгээр хороодын төрийн албан хаагчид суралцлаа.

Сургалтаар Монгол Улсын урт хугацааны хөгжлийн бодлого, түүний зорилго, зорилт, засаглал, ногоон хөгжил, эдийн засаг, орон нутгийн хөгжил, хүний хөгжил, шинэ сэргэлтийн бодлого зэрэг олон талт мэдлэг мэдээллийг олгож, албан хаагчдыг чадавхжууллаа.

 Чингэлтэй дүүргийн Засаг даргын Тамгын газрын ажилтан, албан хаагчид шинэ долоо хоногийн ажлаа ээлжит “Мэдээллийн цаг”-аараа эхэллээ.

Өнөөдрийн “Мэдээллийн цаг”-аар Хяналт шинжилгээ, үнэлгээний хэлтсийн дарга Н.Наранзул, Хэвлэл мэдээлэл, олон нийттэй харилцах тасгийн дарга А.Мөнхчимэг мэдээлэл өглөө.

Дүүргийн ажилтан, албан хаагчдад чиглэсэн “Мэдээллийн цаг” арга хэмжээ нь 14 хоногт нэг удаа тогтмол зохион байгуулагддаг бөгөөд албан хаагчдын мэдлэг, ур чадварыг дээшлүүлэх, сургаж хөгжүүлэх, ёс зүйг мөрдүүлж, харилцаа хандлагыг сайжруулах зорилготой юм.

Дүүргийн нутаг дэвсгэрт 2023 оны нэгдүгээр ээлжийн цэргийн жинхэнэ албаны татлага 05 дугаар сарын 05-ны өдрөөс 07-ны өдрүүдэд явагдах болсонтой холбогдуулан хороодын Засаг дарга, зохион байгуулагч, хэсгийн ахлагч нартай 2023 оны 04 дүгээр сарын 20-ны өдөр цэрэг татлагын семинар зохион байгуулж цэргийн жинхэнэ албанд татах зарлан дуудах мэдэгдлийг хороодод тараасан.

Цэрэг татлагын товчооны орлогч дарга, дүүргийн Засаг даргын Тамгын газрын Цэргийн штабын дарга хурандаа Н.Энхбат хорооны Засаг дарга, зохион байгуулагч нарт ажил үүргийн хуваарь болон цэрэг татлагын бэлтгэл ажлын явц цаашид хийгдэх ажлын талаар танилцуулга хийж, цэргийн жинхэнэ албаны татлагыг амжилттай зохион байгуулан дээд байгууллагаас өгөгдсөн хяналтын тоон даалгаврыг бүрэн биелүүлэх, цэргийн насны залуучуудыг идэвхтэй хамруулах талаар мэргэжил, арга зүйн зөвлөгөө өгч шалган туслах ажлын талаар танилцуулж үүрэг даалгавар өглөө.

Мөн Авлигатай тэмцэх газрын Урьдчилан сэргийлэх соён гэгээрүүлэх хэлтсийн ажилтан комиссар Б.Мөнхболд, А.Тунамал-Эрдэнэ нар авлигын гэмт хэргийн тухай ойлголт, Ашиг сонирхлын зөрчлийн тухай ойлголт сэдвээр тус тус сургалт зохион байгууллаа.

Чингэлтэй дүүрэгт нийтийн эзэмшлийн гудамж, талбай, аж ахуйн нэгжүүдийн гадна талбайг хянах Камерын нэгдсэн төв өнгөрсөн оны 10 дугаар сараас үйл ажиллагаагаа явуулж байгаа билээ.

Тэгвэл уг төвийн үйл ажиллагааг нийслэл хотод жишиг болгон гэмт хэрэг зөрчлийг хэрхэн илрүүлж байгаа сайн жишгийг дүүргээс сонгогдсон УИХ-ын гишүүн, Монгол Улсын сайд Ж.Сүхбаатар, УИХ-ын гишүүн, Байнгын хорооны дарга М.Оюунчимэг болон бусад албаны хүмүүст өнгөрсөн амралтын өдөр дүүргийн удирдлагууд танилцуулав.

“Нийслэлийн хэмжээнд анхдагч болох Камерын нэгдсэн төв нь дүүргийн 1, 2, 3, 4, 5, 6 дугаар хороо буюу байшин хорооллыг иж бүрэн камержуулалт хийж дуусаад байна. Мөн дүүргийн 12, 21 дүгээр хорооны 317 га газрыг камержуулах ажлын судалгаа хийж хэрэгжүүлэх бэлтгэл ажлыг ханган ажиллаж байна.

Цаашлаад үлдсэн гэр хорооллын бүсийн хороодыг энэ онд үе шаттайгаар камержуулах ажлыг төлөвлөж “Ногоон бүс” болгохоор ажиллаж байгааг” Засаг дарга Н.Батсүмбэрэл дурдлаа.

Гэмт хэрэг зөрчлийн дуудлага мэдээлэл өмнөх үеэс 50 хувиар буурч, хэргийн илрүүлэлт 70 хувиар өссөн тоо баримтыг Цагдаагийн байгууллагаас хэллээ. Шинээр суурилуулсан камерууд нь -40C+40C градуст хэвийн ажиллах горимтой бөгөөд цахилгааны ямар ч хүчдэлийг даах хүчин чадалтай юм.

 Монгол Улсын Ерөнхийлөгч У.Хүрэлсүхийн санаачилсан "Тэрбум мод” үндэсний хөдөлгөөний хүрээнд Чингэлтэй дүүргийн Социал Демократ Монголын Залуучуудын Холбоо "Моддоо усалъя” хаврын цэнэг усалгааны аян эхлүүлээд байгаа билээ.

“Модоо усалъя” хаврын цэнэг усалгааны аянд Чингэлтэй дүүргээс сонгогдсон УИХ-ын гишүүн, Монгол Улсын сайд Ж.Сүхбаатар, УИХ-ын гишүүн, Нийгмийн бодлогын байнгын хорооны дарга М.Оюунчимэг, дүүргийн ИТХ-ын дарга Б.Мөнхбат, Засаг дарга Н.Батсүмбэрэл, Засаг даргын орлогч П.Отгонбаатар нар болон холбогдох албаны хүмүүс оролцлоо.

Хаврын мод тарих аянг угтаж дүүргийн “Хайрхан хөгжлийн төв-1”-ийн моддыг услан, арчлах ажлаар энэ хаврын мод тарих аянаар манлайлал үзүүлж ажиллав.

Тус аян нь 2023 оны 04 дүгээр сарын 15-наас 2023 оны 05 дугаар сарын 10-ны өдрийн хугацаанд өрнөх юм.

Стратегийн команд штабын дадлага сургууль зохион байгуулах бэлтгэл ажлыг хангуулах ерөнхий ажлын хэсэг, гамшгаас хамгаалах алба, мэргэжлийн ангийн удирдах бүрэлдэхүүнд чадавхжуулах сургалтыг өнөөдөр зохион байгууллаа.

Сургалтыг нээж Чингэлтэй дүүргийн Засаг даргын орлогч Д.Отгонбаатар үг хэлж, Онцгой байдлын хэлтсийн дарга, хурандаа Б.Батбилэг стратегийн команд штабын дадлага, сургуулийн бэлтгэл ажлын явц, үр дүн, цаашид хийж хэрэгжүүлэх арга хэмжээний талаар мэдээлэл хийлээ.

Сургалтыг Онцгой байдлын ерөнхий газрын Гамшгаас урьдчилан сэргийлэх газрын Урьдчилан сэргийлэх хэлтсийн дарга, хурандаа Б.Бат-Эрдэнэ “Команд-штабын сургуулийн тухай ерөнхий ойлголт, анхаарах асуудал”, “Ослын үеийн удирдлагын тогтолцоо” сэдвээр, Онцгой байдлын ерөнхий газрын Гал түймэртэй тэмцэх газрын Гал түймэр унтраах, хөдөлмөр хамгаалал аюулгүй ажиллагааны хэлтсийн дарга, дэд хурандаа, П. Соронзонболд “Мэргэжлийн ангийн тактикийн үзүүлэх сургуулийн хэсэг” сэдвээр тус тус сургалтыг зохион байгууллаа.

Мөн энэ үеэр дадлага сургуулийн үед байгууллага, албадын уялдаа холбоо хэрхэн хангаж ажиллах талаар мэдлэг мэдээлэл өгч цаашид бэлтгэл ажлын хүрээнд анхаарах зүйлсийн талаар заавар, зөвлөмжийг хүргэлээ.

Чингэлтэй дүүргийн Засаг даргын Тамгын газар, "Golden robo" компанитай хамтран хүүхдүүдэд программчлал, инженерчлэлийн анхан шатныг ойлголтыг олгох зорилготой хэрэгжүүлсэн төслийн хүрээнд дүүргийн ерөнхий боловсролын нийт 13 сургуулийн мэдээлэлзүйн багшийг сургалтад хамрууллаа.

Уг сургалтад хамрагдсан багш нарт "Микролион" роботыг Чингэлтэй дүүргийн Засаг даргын тамгын газрын дарга П.Баянбаатар гардууллаа.

Стратегийн Команд штабын сургалт зохион байгуулах ажлын хүрээнд Чингэлтэй дүүргийн Онцгой байдлын хэлтсээс Цагдаагийн Ерөнхий газрын Зөрчлийн хэрэг бүртгэлт, мэргэжил аргазүйн хэлтсийн албан хаагчдад сургалт зохион байгууллаа.

“Газар хөдлөлтийн гамшгийн аюулаас урьдчилан сэргийлэх, авах арга хэмжээ" сэдэвт сургалтад 42 албан хаагч хамрагдлаа.

Мөн энэ үеэр тус байгууллагын алба хаагчид ой хээр, өнжмөл шар өвсний гал түймрээс урьдчилан сэргийлэх #шар_өвс_шатахуунтай_адил_шатна аянд нэгдлээ.

Хөгжлийн бэрхшээлтэй хүний эрхийг хамгаалахад чиглэсэн төрөөс хэрэгжүүлж буй бодлого, шийдвэр, хэрэгжилт, халамжийн болон бусад үйлчилгээний хүртээмжийг нэмэгдүүлэх, хөгжлийн бэрхшээлтэй иргэдийн санал хүсэлтийг сонсох зорилгоор Чингэлтэй дүүргийн Засаг даргын Тамгын газар, Хөдөлмөр халамж үйлчилгээний хэлтэс хамтран “Хамтдаа оролцъё, хамтдаа хөгжье-2” уулзалт хэлэлцүүлгийг зохион байгууллаа.

Уулзалт хэлэлцүүлэгт дүүргийн 1-24 дүгээр хороодын хөгжлийн бэрхшээлтэй иргэд, төрийн болон төрийн бус байгууллага, хөдөлмөр эрхлэлтийг дэмжих хөтөлбөрийн үр шимийг хүртсэн иргэд оролцож дуу хоолойгоо хүргэлээ.
Хэлэлцүүлэгт Чингэлтэй дүүргийн Засаг дарга Н.Батсүмбэрэл, Монгол Улсын Ерөнхий сайдын Нийгмийн хөгжлийн асуудал эрхэлсэн зөвлөх Ч.Ундрахбаяр, Чингэлтэй дүүргийн Хөдөлмөр халамж үйлчилгээний хэлтсийн дарга А.Сэрээтэр болон бусад албаны хүмүүс оролцлоо.

Чингэлтэй дүүрэгт 4400 гаруй хөгжлийн бэрхшээлтэй иргэд байгаагаас 500 гаруй нь хүүхэд юм. Эдгээр хүмүүсийн нийгмийн баталгааг хангах, тэдэнд чиглэсэн төрийн үйлчилгээний талаар болон дүүргийн зүгээс хийж хэрэгжүүлж буй ажлын талаар мэдээлэл өглөө. Төрийн байгууллагаас хөгжлийн бэрхшээлтэй иргэдэд үзүүлж буй бодлого шийдвэр, тэдний онцлогт тохирсон хүний нөөцийн тогтвортой байдал, бизнес эрхлэх боломжийн талаар ярилцаж, хамтран санал солилцов.

Мөн дүүргээс хэрэгжүүлсэн арга хэмжээ, гарааны бизнес эрхлэгчдийн дэмжсэн хөтөлбөрт хамрагдаж үр шимийг нь хүртсэн хөгжлийн бэрхшээлтэй иргэд харилцан туршлага солилцож, зөвлөмж зөвлөгөө өгч, хамтран шийдэлд хүрэх талаар ярилцлаа.

Хэлэлцүүлгийн үеэр иргэдэд зориулсан эрүүл мэндийн тусламж үйлчилгээ, улсын бүртгэл, нийгмийн даатгал, татвар, хөдөлмөр, халамжийн үйлчилгээний чиглэлээр төрийн үйлчилгээг хүргэж, үйлдвэрлэл эрхлэгч, тус иргэд, үйлдвэрлэгчид үйлдвэрлэсэн бүтээгдэхүүнээрээ үзэсгэлэн гаргалаа.

Хөдөлмөрийн тухай хуулийн 16.1.6 дахь заалт, Хөдөлмөр нийгмийн түншлэлийн гурван талт үндэсний хорооны 2022 оны 5 дугаар тогтоолоор батлагдсан “Сум, дүүргийн хөдөлмөрийн эрхийн маргаан зохицуулах гурван талт хорооны дүрэм”-ийн 2.6 дахь хэсэгт заасны дагуу Чингэлтэй дүүрэгт Хөдөлмөрийн эрхийн маргаан зохицуулах гурван талт хороо байгуулагдсан.

Дүүргийн Хөдөлмөрийн эрхийн маргаан зохицуулах гурван талт хороо өнөөдөр ээлжит хурлаа хуралдуулж, долоон иргэний асуудлыг хэлэлцэн, холбогдох шийдвэрийг гаргалаа.

Хөдөлмөрийн эрхийн маргаан зохицуулах гурван талт хороо нь Хөдөлмөрийн маргаанаас урьдчилан сэргийлэх, шүүхийн өмнөх шатанд эвлэрүүлэн зуучлах үүрэгтэй бөгөөд долоо хоног бүр хуваарийн дагуу хуралдаж, хүсэлт ирүүлсэн иргэдийн асуудлыг хуулийн хугацаанд хэлэлцэн шийдвэрлэж байна.

Монгол Улсын Засгийн газар, НҮБ-ын Хүн амын сангийн хамтран хэрэгжүүлж буй “Жендерт суурилсан хүчирхийлэлтэй тэмцэх нь” төслөөс зарласан бичил төслийн уралдаанд “Чингэлтэйчүүд сайн сайханд дагуулна” төсөл шалгарлаа.

Дүүргийн Жендэрийн салбар хороо нь Чингэлтэй дүүргийн Засаг даргын 2020-2024 оны мөрийн хөтөлбөрийн хүний хөгжлийн бодлогыг хэрэгжүүлэх ажлын хүрээнд Швейцарын хөгжлийн агентлагийн дэмжлэгтэйгээр хэрэгжсэн тус төсөлд оролцсон юм.

Төслийн тэтгэлгийг Жендэрийн үндэсний хорооны Ажлын албаны дарга Т.Энхбаяр, НҮБ-ын Хүн амын сангийн тэргүүн Халид Шарифи нар дүүргийн Жендэрийн салбар хорооны гишүүн Т.Түвшинжаргалд гардуулан өглөө.

“Чингэлтэйчүүд сайн сайханд дагуулна” төсөл нь өнөөгийн нийгэмд тулгамдаж буй гэр бүлийн хүчирхийлэл, эрэгтэйчүүдийн жендэр, хүний эрх, иргэдийн жендэрийн талаарх зөв ойлголт, мэдлэгийг нэмэгдүүлэх, нийгмийн бүх түвшинд, бүх төрлийн хүчирхийллээс урьдчилан сэргийлэх, таслан зогсоох үйл ажиллагаанд эрэгтэйчүүдийг үр дүнтэйгээр татан оролцуулах, өсвөр үеийн хөвгүүдэд нөлөөлөх сайн туршлагыг бий болгон, соён гэгээрүүлэх олон талт ажлыг зохион байгуулж ажиллах зорилготой юм.