Нийслэлийн иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, явган хүний зам, талбайн хүрэлцээ, хангамжийг нэмэгдүүлэх, авто замын түгжрэлийг бууруулах зорилтын хүрээнд Чингэлтэй дүүрэгт газар чөлөөлөлтийн ажил эрчимтэй хийгдэж байна.

Нийслэлийн Засаг даргын Газрын зөрчил арилгах А/321 дүгээр захирамжийн дагуу Чингэлтэй дүүргийн 5 дугаар хорооны нутаг дэвсгэрт Аз их дэлгүүр, 5 дугаар байрны голд байрлалтай 8 ширхэг тоосгон гараашийг буулгаж газар чөлөөлөлтийн ажил хийгдлээ.

Чингэлтэй дүүргийн 170 мянга гаруй иргэдийн эрүүл мэндийг хамгаалах, чанартай тусламж үйлчилгээ үзүүлэх улсын төсвийн 16 тэрбум төгрөгийн хөрөнгө оруулалтаар 8 давхар, нийт 6182 м/кв талбай бүхий Чингэлтэй дүүргийн Эрүүл мэндийн төвийн өргөтгөлийн барилгын ажлыг өнөөдөр эхлүүллээ.

Тус барилгын шав тавих арга хэмжээнд Чингэлтэй дүүргийн иргэдийн Төлөөлөгчдийн Хурлын дарга Б.Мөнхбат, Засаг даргын орлогч, ИТХ-ын Төлөөлөгч Д.Отгонбаатар, дүүргийн Эрүүл мэндийн төвийн дарга Н.Нямсүрэн, Нийслэлийн эрүүл мэндийн газрын хэлтсийн дарга, дүүргийн ЭМТ-ийн эмч, ажилчид оролцлоо.

Тус барилга:

• В1 ДАВХАР: Ариутгал, угаалга, зоорийн өрөө, ажилчдын хувцас солих, эмнэлгийн хог хаягдал, цахилгаан, дулааны щит, ханын хүчилтөрөгчийн систем

• 1-Р ДАВХАР А хэсэг: Хэвтэн эмчлүүлэх, гарах үйлчилгээний хэлтэс, эмийн сан, угтах үйлчилгээ, даатгал, цахим бүртгэл, өлгүүр

• 1-Р ДАВХАР Б хэсэг: Хүлээн авах, яаралтай тусламж, травмпункт, тусгаарлах, дүрс оношилгоо /рентген, компьютер томографийн өрөө/

• 2-Р ДАВХАР: Оношилгооны хэсэг-дуран, тархи, зүрх, хэвлийн хэт авиан оношилгоо, лаборатори, хими эмчилгээ, гемодиализ

• 3-Р ДАВХАР: Хагалгааны блок, хүүхэд болон насанд хүрэгчдийн эрчимт эмчилгээний тасаг

• 4-Р ДАВХАР: Гал тогоо, эмнэлгийн алба /ЭЭО, чанар, даатгал, халдвар судлагч, дүн бүртгэл/ мэдээллийн технологич, сервер, төгсөлтийн дараах сургалтын алба, ЭМД-ийн архив

• 5-Р ДАВХАР: Сэргээн засах уламжлалт эмчилгээний тасаг

• 6-9-Р ДАВХАР: Гэмтэл, мэс засал, мэдрэл, хүүхэд, сэргээн засах, уламжлалт, дотрын хэвтэн эмчлүүлэх тасгууд /1 давхарт 38-48 ортой/ давхарт тус тус байрлах юм.

 Иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, явган хүний зам, талбайн хүрэлцээ хангамжийг нэмэгдүүлэх, авто замын түгжрэлийг бууруулах, тохижилтын ажил гүйцэтгэх боломжийг бүрдүүлэх зорилгоор Чингэлтэй дүүрэгт газар чөлөөлөлтийн ажил эрчимтэй хийгдэж байна.

Өчигдөр Чингэлтэй дүүргийн IV хорооны орон сууцны 9 дүгээр байрны хойд талд байрлалтай 8 тоосгон авто гараашийг буулгаж, газрыг чөлөөллөө.

Дүүргийн Газар зохион байгуулалтын алба тус газрыг чөлөөлсний дараа оршин суугчдаас санал авч, тухайн саналыг үндэслэн тохижилт бүтээн байгуулалтын ажлыг хийх юм.

✅ Чингэлтэй дүүрэг, Япон Улсын Шизуока мужийн Яйзү хоттой 2022 онд боловсрол, соёл урлаг, эрүүл мэнд, спорт, худалдаа, аж үйлдвэр зэрэг салбарт хамтран ажиллах санамж бичиг зурсан юм.

Энэхүү ажлын хүрээнд Шизүока мужийн Чөлөөт бөхийн холбооны дэд тэргүүн, багш Нагано Хироюки, Чөлөөт бөхийн холбооны гишүүн, багш, Спортын хэлтсийн мэргэжилтэн Окамото Казүки нар дүүргийн Биеийн тамир, спорт хорооны чөлөөт бөхийн багш дасгалжуулагч, сурагчдад чөлөөт бөхийн онол, практикийн сургалтыг хоёр өдөр зааж туршлагаа солилцлоо.

Мөн санамж бичгийн хүрээнд ажилтан солилцооны хөтөлбөрийн дагуу Яйзү хотын Татварын хэлтсийн мэргэжилтэн Фүкүчи Ёшихико, дүүргийн Засаг даргын Тамгын газарт албан томилолтоор долоон хоногийн хугацаанд ажиллах юм.   

Чингэлтэй дүүргийн Гэр бүл, хүүхэд, залуучуудын хөгжлийн хэлтсийн дэргэд эрэгтэйчүүдэд сэтгэл зүйн зөвлөгөө өгөх жишиг төв нээлтээ хийлээ.

НҮБ-ын Хүн амын сан, Швейцарын хөгжлийн агентлагтай хамтран хэрэгжүүлж буй “Жендэрт суурилсан хүчирхийлэлтэй тэмцэх нь” төслийн хүрээнд нээгдэж буй тус төвийн нээлтэд Нэгдсэн үндэстний байгууллага, Хөдөлмөр, нийгмийн хамгааллын яам, Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газар, Нийслэлийн Гэр бүл, хүүхэд, залуучуудын хөгжлийн газар, дүүргийн ЗДТГ-ын удирдлагууд оролцлоо.

Энэхүү эрэгтэйчүүдэд сэтгэл зүйн зөвлөгөө өгөх жишиг төв нээгдсэнээр жендэрт суурилсан хүчирхийллийг бууруулах, эрэгтэйчүүдийн сэтгэлзүйн тулгамдсан асуудлыг шийдвэрлэх ач холбогдолтой юм. Манай улсын нийт хүн амын 49,1 хувийг эрэгтэйчүүд эзэлдэг бөгөөд дундаж наслалт эмэгтэйчүүдийнхээс даруй 9,5 жилээр доогуур байна.

Тиймээс тус төв иргэд, олон нийтэд үнэ төлбөргүй үйлчилгээ үзүүлэх зорилготой байгуулагдаж байгаа юм. Тухайлбал, судалгаа, шинжилгээний ажил, сургалт зохион байгуулах, ижил чиглэлээр үйл ажиллагаа явуулдаг ТББ-ын үйл ажиллагааг дэмжин ажиллах, биечлэн болон утсаар хууль эрх зүй, нийгэм-сэтгэл зүйн зөвлөгөө, мэдээллийг мэргэжлийн нийгмийн ажилтан, сэтгэл зүйч нар өгч ажиллах юм.

Тус жишиг төвийн үйл ажиллагааг төр, төрийн бус байгууллагын түншлэлийн хүрээнд төрийн бус байгууллагаар гэрээлэн гүйцэтгүүлж байгаа бөгөөд цаашид эрэгтэйчүүдийн чиглэлээр үйл ажиллагаа явуулдаг үндэсний сүлжээ үүсгэхээр төлөвлөөд байна.

 “Шинэ сэргэлт-Чингэлтэй” санаачлагын хүрээнд хөрсний бохирдол түүний хор уршгийн талаар мэргэжлийн судлаачдын санал дүгнэлт, зөвлөмжид үндэслэн өнөөгийн нөхцөл байдлыг тодорхойлох, шийдвэр гаргагчид болон иргэдийг мэдээллээр хангаж, хөрсний бохирдлоос сэргийлэх шийдэл олох зорилгоор "Асуудал шийдэл" хэлэлцүүлгийг өнөөдөр Төрийн ордны Их танхимд Чингэлтэй дүүргийн ИТХ, ЗДТГ санаачлан зохион байгууллаа.

Тус хэлэлцүүлэгт УИХ-ын гишүүн, Монгол Улсын сайд Ж.Сүхбаатар, УИХ-ын гишүүн М.Оюунчимэг, Чингэлтэй дүүргийн иргэдийн Төлөөлөгчдийн Хурлын дарга Б.Мөнхбат, Засаг дарга Н.Батсүмбэрэл болон ИТХ-ын Төлөөлөгчид, хороодын Засаг дарга нар, 1-24 дүгээр хороодын иргэдийн төлөөлөл оролцлоо.

“Улаанбаатар хотын хөрсний бохирдол”, “Чингэлтэй дүүргийн хөрсний бохирдол, доройтол түүнийг бууруулах арга зам”, “Хашааны хөрс сайжруулах арга зам, хөрс сайжруулах технологиуд” сэдэвт илтгэлийг Монголын залуу эрдэмтдийн холбооны тэргүүн, доктор, П.Оюунбат, ШУА-ийн Газарзүй, геоэкологийн хүрээлэнгийн хөрс судлалын доктор Ө.Ганзориг, Хөрсний лабораторийн эрхлэгч Ц.Болормаа нар тавьж хэлэлцүүллээ. Улаанбаатар хотын иргэдийн эрүүл мэндэд агаарын бохирдолтой дүйцэхүйц хор хөнөөл үзүүлж буй нэг хүчин зүйл нь хөрсний бохирдол юм.

Утаа шиг харагдахгүй ч хүний эрүүл мэндэд болон байгаль орчинд сөрөг нөлөө үзүүлж буй хөрсний бохирдлыг нүхэн жорлон, хашаандаа ухсан жорлон, муу усны нүхүүд үүсгэж буй. Нийслэлийн нийт иргэдийн эрүүл мэндийн тулгамдсан асуудал болоод буй энэхүү сэдэвт юуны өмнө Чингэлтэй дүүрэг анхаарал хандуулж тус хэлэлцүүлгийг зохион байгуулж байгаа нь ач холбогдолтой юм.

Өнөөдрийн хэлэлцүүлгээр хөрсний бохирдолтоос хамаарч 60 гаруй төрлийн халдварт өвчин үүсдэг. Ил задгай жорлонгийн хаягдал, түүнээс ялгарах аммиак буюу шивтрийн хий, хүхэр хүчлийн давхар исэл зэрэг хорт бодис нь агаарт дэгдэж, амьсгалаар дамжин хүний эрүүл мэндэд сөрөг нөлөө үзүүлдэг зэрэг судалгаа шинжилгээтэй мэдээ, мэдээллийг хүргэв.

✅ Чингэлтэй дүүрэг, Япон Улсын Шизуока мужийн Яйзү хоттой 2022 онд боловсрол, соёл урлаг, эрүүл мэнд, спорт, худалдаа, аж үйлдвэр зэрэг салбарт хамтран ажиллах санамж бичиг зурсан юм.

Энэ хүрээнд өнөөдөр  Чингэлтэй дүүргийн Засаг даргын орлогч Д.Отгонбаатар, Засаг даргын Тамгын газрын дарга П.Баянбаатар, Төрийн захиргааны удирдлагын хэлтсийн дарга Л.Баярмаа, Боловсролын хэлтсийн дарга А.Очир, Биеийн тамир, спорт хорооны дарга Б.Мөнхбаяр нар Яйзү хотын багш, мэргэжилтнүүдийг  хүлээн авч уулзлаа.

Шизуока мужийн Чөлөөт бөхийн холбооны дэд тэргүүн, Чөлөөт бөхийн багш Нагано Хироюки, Чөлөөт бөхийн холбооны гишүүн, багш, Спортын хэлтсийн мэргэжилтэн Окамото Казүки, Татварын хэлтсийн мэргэжилтэн Фүкүчи Ёшихико, Олон улсын харилцааны мэргэжилтэн Б.Янжинлхам нар дүүрэгт ажиллаж юм. 

✅Нийслэлийн Чингэлтэй дүүргийн дүүргийн Боловсролын хэлтэс, Замын цагдаагийн хэлтэс хамтран хүүхэд багачууд, эцэг эхчүүдэд замын хөдөлгөөнд зөв боловсон оролцох дадал хэвшил олгох, зам тээврийн осол зөрчлөөс урьдчилан сэргийлэх тухай хууль дүрмийн мэдлэгийг олгох, түгээх, сурталчлах зорилгоор Сургуулийн өмнөх боловсролын байгууллагуудын дунд “Замын хөдөлгөөний цагаан толгой”  тэмцээн амжилттай зохион байгуулагдлаа.

Тэмцээний шагнал гардуулах үйл ажиллагаанд  дүүргийн Засаг даргын Тамгын газрын дарга П.Баянбаатар, Боловсролын хэлтсийн дарга А.Очир, Чингэлтэй дүүргийн Замын цагдаагийн хэлтсийн ахлах зохицуулагч хошууч Т.Заяасайхан, Замын цагдаагийн хэлтсийн зохицуулагч дэслэгч Ц.Гомбожав болон сургуулийн өмнөх боловсролын Ерөнхий боловсролын сургуулийн баг тамирчид оролцлоо.

✅“Замын хөдөлгөөний цагаан толгой 2023” тэмцээний шилдгээр

✅Нэгдүгээр байранд: СӨБ-ын 18 дугаар цэцэрлэг

✅Дэд байранд: СӨБ-ын 246 дугаар цэцэрлэг

✅Гутгаар байранд: СӨБ-ын 5 дугаар цэцэрлэг

✅Тусгай байранд СӨБ-ын 298 дугаар цэцэрлэг тус тус шалгарч, тэмцээнд оролцсон хүүхэд багачуудад гарын бэлэг гардууллаа.

?Хүүхдийг зам тээврийн хэрэг, ослоос урьдчилан сэргийлэх, замын хөдөлгөөнд оролцох зөв дадалд сургах, аюулгүй байдлаа хэрхэн хангах талаар хууль, эрх зүйн мэдлэг олгох тэдний эцэг, эх, асран хамгаалагч нарын үүрэг хариуцлагыг сайжруулах, сургуулийн багш, нийгмийн ажилтнуудын оролцоог нэмэгдүүлэх  зорилгоор н 20 баг оролцож байна.

Монгол Улсын Ерөнхийлөгч НҮБ-ын индрээс 2030 он гэхэд “Тэрбум мод” тарьж ургуулахаар төлөвлөн зарлаж орон даяар нэг тэрбум мод тарих үндэсний хөдөлгөөн 2021 оны 10 дугаар сард албан ёсоор эхэлснээс хойш Чингэлтэй дүүрэгт өрнөсөөр байгаа билээ.

Энэ жилийн хаврын мод тарих Тэрбум мод  үндэсний хөдөлгөөн дүүргийн  харьяа хэлтэс албад, хороодын ажлын алба, ерөнхий боловсролын сургууль цэцэрлэгүүд, хувийн хэвшлийн аж ахуй нэгж байгууллагууд мод тарих ажилд идэвхтэй оролцож байна.

Тус хөдөлгөөний хүрээнд дүүргийн удирдлагууд, ажилтан албан хаагчид 19 дүгээр хорооны нутаг дэвсгэрт байрлах “Хайрхан хөгжлийн төв”-ийн талбайд өнөөдөр мод тарилаа.

Чингэлтэй дүүргийн иргэдийн Төлөөлөгчдийн Хурлын дарга Б.Мөнхбат, Чингэлтэй дүүргийн Засаг дарга Н.Батсүмбэрэл,  болон Нийслэл, дүүргийн ИТХ-ын Төлөөлөгчид мод тарих аянд нэгдэн мод суулгалаа.

Дүүргийн мод тарих боломжтой түшиц газруудад мэргэжлийн байгууллагын тусламжтайгаар ногоон төлөвлөлтийн зураг төслийн дагуу 3 төрлийн 3000 мод (нарс, хайлаас, улиас) тарих юм.

Масам 2 төслийг Чингэлтэй дүүргийн 16 дугаар хорооны “Тэгш-Өлзий” өрхийн эрүүл мэндийн төвд хэрэгжүүлэхээр Дэлхийн зөн ОУБ, Боловсрол ирээдүй хөгжлийн гарц ТББ-тай хамтран ажиллах санамж бичгийг байгуулан нэг сарын хугацаанд хэрэгжүүлсэн ажлын зөвлөлдөх уулзалт зохион байгуулагдлаа.

Уг төслийн үр дүнд нийгмийн эгэх хариуцлагыг бэхжүүлэх замаар эрүүл мэндийн салбарт төрийн хөрөнгө санхүүг зохистой зарцуулж, төрийн хөрөнгө оруулалтын үр дүн, төрийн үйлчилгээний чанар хүртээмж нэмэгдэх, уялдаа холбоо сайжруулах зорилготой.

Мөн мэдээлэл холбооны технологид суурилсан платформыг ашиглан иргэд шаардлагатай мэдээллээ авах, санал хүсэлтээ илгээх, бас орон нутийн иргэний нийгмийн байгууллагууд тухайн орон нутагтаа тулгамдсан асуудлуудыг тодорхойлсноор төрийн байгууллагын үйл ажиллагаанд хүрч чанар хүртээмж сайжрах боломжтой болж байна.

Цаашид Төслийн хүрээнд гарсан санал санаачилгыг дэмжих иргэдээс гарсан саналууд болох боловсон хүчнийг мэргэшүүлэх, чадваржуулах мөн нарийн мэргэжлээр сургах тал дээр холбогдох газруудтай хамтран ажиллах боломж нөхцлийг бүрдүүлж ажиллана.

“Монголын гар утасны бизнес эрхлэгчдийн Үндэстэн Холбоо”, НҮТББ-ын 6 жилийн ойн хүрээнд зохион байгуулагдаж буй спортын дөрвөн төрөлт тэмцээн 2023 оны тавдугаар сарын 8-9-ний өдрүүдэд болж өндөрлөлөө. Уг тэмцээнд гар утас худалдан борлуулдаг 11 худалдааны төвийн баг тамирчид оролцож гар бөмбөг, сагсан бөмбөг, дартс, ширээний теннис гэсэн спортын 4 төрлөөр хурд хүч, авхаалж самбаагаа сорин өрсөлдсөн юм.

Тэмцээний;  Сагсан бөмбөгийн эрэгтэй төрөлд Н.Мөнгөн-Эрдэнэ ахлагчтай “Tеди” төвийн баг, эмэгтэй төрөлд “Tеди-2” төвийн Д.Ариунтуяа ахлагчтай баг,  Гар бөмбөгийн эрэгтэй төрөлд А.Мөнх-Эрдэнэ ахлагчтай “Теди” төвийн баг, эмэгтэй төрөлд Ц.Жавзандулам ахлагчтай баг,  Ширээний теннисний эрэгтэй төрөлд Хархорин төвийн тамирчин Г.Галдандорж, эмэгтэй төрөлд “Mobi shop” төвийн тамирчин Д.Одонтунгалаг,  Дартсын эрэгтэй төрөлд А.Мөнх-Эрдэнэ, эмэгтэй төрөлд Т.Болортунгалаг нар аваргалж алтан медалийн эзэд боллоо.

Онооны нийлбэр дүнгээрээ “Теди” төвийн баг тамирчид тэргүүлж, шилжин явах аваргын цомыг хүлээн авлаа.

Гар бөмбөгийн тэмцээний шилдэг тоглогчоор Л.Гомбосүрэн, Б.Алтанзагас, сагсан бөмбөгийн тэмцээний шилдэг довтлогчоор Б.Нямхүү, Б.Алтанзагас нар шалгарлаа.

Тус тэмцээнийг УИХ-ын гишүүн Ж.Сүхбаатар, Чингэлтэй дүүргийн Засаг дарга Н.Батсүмбэрэл нар дэмжсэн бөгөөд баг тамирчдад баяр хүргэн амжилт хүсэв. Амрах завгүй ажилладаг бизнес эрхлэгчид маань хоёр өдөр спортоор нөхөрлөж, эрүүл мэнддээ хөрөнгө оруулалт хийлээ. Мөн тэмцээний үеэр хөгжөөн дэмжигчдийн дунд олс таталтын тэмцээн явагдсан юм.