Чингэлтэй дүүргийн 1-24 дүгээр хороодын төрийн албан хаагчид, хэсгийн ахлагч нартай дүүргийн удирдлагууд хуваарьт уулзалтыг зохион байгуулж байгаа билээ.

Өнөөдөр 10, 14 дүгээр хороодын төрийн албан хаагчид, хэсгийн ахлагчидтай хийсэн уулзалтад Засаг даргын Тамгын газрын дарга П.Баянбаатар, Төрийн захиргааны удирдлагын хэлтсийн дарга Л.Баярмаа, Боловсролын хэлтсийн дарга А.Очир нар оролцож, хэрэгжүүлж буй үйл ажиллагаа, хөрөнгө оруулалтын ажлуудын талаар танилцуулллаа.

Мөн ажилтан албан хаагчид, хэсгийн ахлагчдад тулгарч буй хүндрэл бэрхшээлтэй болон ажиллах орчин, нөхцөл байдлын талаар санал солилцлоо.

Бусад хороодтой уулзах уулзалт хуваарийн дагуу үргэлжилнэ.

Дүүргийн Засаг даргын 2023 оны “Гамшгаас хамгаалах бэлэн байдлын үзлэг зохион байгуулах тухай” А/138 дугаар захирамжийн хэрэгжилтийг хангах, зургаадугаар сард зохион байгуулагдах “Стратегийн команд штабын дадлага сургууль”-ийн бэлтгэл ажлын хүрээнд дүүргийн гамшгаас хамгаалах алба, мэргэжлийн анги, төрийн болон төрийн өмчит байгууллагын томилгоот бүрэлдэхүүний бэлтгэл, бэлэн байдлыг дээшлүүлэх зорилгоор “Гамшгаас хамгаалах бэлэн байдлын үзлэг”-ийг дүүргийн Онцгой байдлын хэлтсийн орлогч, гашгаас хамгаалах улсын хяналтын ахлах байцаагч, хошууч Б.Амандыхаар ахлуулсан ажлын хэсгийн бүрэлдэхүүн зохион байгуулж эхэллээ.

Дүүргийн гамшгаас хамгаалах Хэв журам сахиулах албаны “Гамшгаас хамгаалах хууль тогтоомж”-ийн хэрэгжилт, гамшгийн үеийн удирдлага зохион байгуулалт, болзошгүй гамшиг, аюулт үзэгдэл, ослын  үед хариу арга хэмжээг шуурхай зохион байгуулах төлөвлөлт, бие бүрэлдэхүүний хөдөлмөр хамгааллын хувцас, хувцасны жигдрэлт, хүн нэг бүрийн үүргэвчинд байх 15 нэр төрлийн зүйлс, жагсаалт, жигдрэлтийн байдал, гамшгийн эрсдэлийн үнэлгээ, гамшгаас хамгаалах ангиллын сургалт зохион байгуулсан байдал, түүний үр дүн  гамшгаас хамгаалах дайчилгаа, нүүн шилжүүлэлтийн төлөвлөлт зэрэг чиглэлээр үзлэгийг зохион байгуулж байгаа бөгөөд дүүргийн Цагдаагийн газрын 1, 2 дугаар хэлтэс, Замын цагдаагийн хэлтсийн бие бүрэлдэхүүн хамаарагдаж байна.

Алба хаагчдыг чадавхжуулах, гамшгийн үед үүрэг гүйцэтгэх хүн, техник, багаж хэрэгсэл, бараа, материалын нөөц, гамшгаас хамгаалах  үйл ажиллагааны төсөв санхүүжилт  үүсч болзошгүй хүндрэл бэрхшээлийг хэрхэн тодорхойлсон байдал,  гамшгийн үеийн хариу арга хэмжээг хэрэгжүүлэх чадавхыг тодотгох, бүрэлдэхүүний бэлэн байдал, чанар хүртээмжийг үнэлэн дүгнэж заавар зөвлөгөө өгч, үр дүн дүүргийн Засаг дарга бөгөөд Онцгой комиссын даргад танилцуулж ажиллана.

Хөдөлмөрийн тухай хуулийн 16.1.6 дахь заалт, Хөдөлмөр нийгмийн түншлэлийн гурван талт үндэсний хорооны 2022 оны 5 дугаар тогтоолоор батлагдсан “Сум, дүүргийн хөдөлмөрийн эрхийн маргаан зохицуулах гурван талт хорооны дүрэм”-ийн 2.6 дахь хэсэгт заасны дагуу Чингэлтэй дүүрэгт Хөдөлмөрийн эрхийн маргаан зохицуулах гурван талт хороо байгуулагдсан.

Дүүргийн Хөдөлмөрийн эрхийн маргаан зохицуулах гурван талт хороо өнөөдөр ээлжит хурлаа хуралдуулж, 3 иргэний асуудлыг хэлэлцэн, холбогдох шийдвэрийг гаргалаа. Хөдөлмөрийн эрхийн маргаан зохицуулах гурван талт хороо нь Хөдөлмөрийн маргаанаас урьдчилан сэргийлэх, шүүхийн өмнөх шатанд эвлэрүүлэн зуучлах үүрэгтэй бөгөөд долоо хоног бүр хуваарийн дагуу хуралдаж, хүсэлт ирүүлсэн иргэдийн асуудлыг хуулийн хугацаанд хэлэлцэн шийдвэрлэж байна.

Чингэлтэй дүүргийн Засаг даргын Тамгын газраас Монголын үсчин, гоо засалчдын холбоотой хамтран “Чингэлтэй-2023” дүүргийн аварга шалгаруулах нээлттэй тэмцээн зохион байгуулах болсонтой холбогдуулан 2023 оны 05 дугаар сарын 02-ны өдөр дүүргийн нутаг дэвсгэрт үсчин, гоо засал, хумс заслын чиглэлээр үйл ажиллагаа эрхэлдэг 20 иргэн, аж ахуйн нэгжид сургалт зохион байгууллаа.

Тус сургалтаар үс засах үйлчилгээнд тавих шаардлага MNS 5160:2020 стандартыг танилцуулан, мастер үсчин, гоо засалчид практик дээр үзүүлбэр үзүүлсэн.

Чингэлтэй дүүргийн Иргэдийн Төлөөлөгчдийн Хурал, Засаг даргын Тамгын газар, дүүргийн Залуучуудын холбоо, Социал демократ залуучуудын холбооноос 2023 оны 5 дугаар сарын 02-ны өдөр “Асуудал-Шийдэл” хөрсний бохирдол сэдэвт хэлэлцүүлгийг 1-24 дүгээр хорооны иргэдийн дунд зохион байгууллаа.

Тус хэлэлцүүлэгт УИХ-ын гишүүн, Монгол Улсын сайд Ж.Сүхбаатар, УИХ-ын гишүүн М.Оюунчимэг, дүүргийн ИТХ-ын дарга Б.Мөнхбат, Засаг дарга Н.Батсүмбэрэл болон хороодын Засаг дарга нар оролцлоо.  

Дүүргийн хөрсний бохирдол түүний хор уршгийн талаар судалгаа шинжилгээ,статистик мэдээнд үндэслэн ШУА, Газарзүй, геоэкологийн хүрээлэн, Хөрс судлалын салбарын дарга Ө.Ганзориг, хөрсний лабораторийн эрхлэгч Ц.Болормаа зэрэг мэргэжлийнхэн дүүргийн хөрсний бохирдол, бууруулах арга зам, хашааны хөрс сайжруулах арга, хөрс сайжруулах технологиуд сэдвээр илтгэл тавьж иргэдийн асуусан асуултад хариулт өглөө.

Чингэлтэй дүүргийн 14, 18 дугаар хорооны гэр хорооллын дахин төлөвлөлтийн зураг төслийг та бүхэнд танилцуулж байна.  Гэр хорооллын дахин төлөвлөлтийн загвар төслийн талбай нь 214 га  бөгөөд Улаанбаатар хотын төв талбайгаас 5,5 км зайд Чингэлтэй дүүргийн 14,18-р хорооны нутаг дэвсгэр хамаарч буй. Барилгажилтын төслөөр иргэдийг тохилог ногоон орон сууцаар хангасан, нийгмийн дэд бүтцийн хүртээмжтэй, амралт, аялал зугаалгын бүс бүхий эрүүл ногоон хороолол бий болгоход чиглэн төлөвлөсөн.

Энэхүү төслийн хүрээнд хотын төв болон зуслангийн бүс, гэр хорооллын нийгэм эдийн засгийн хөгжлийг холбосон ухаалаг, цомхон байх төлөвлөлтийн зарчмыг баримтлан төслийг боловсруулсан байна.

Манай улс жил бүрийн 4 дүгээр сарыг хөдөлмөрийн аюулгүй байдал, эрүүл ахуйн сар болгон зарлаж, ХАБЭА-н урьдчилан сэргийлэх арга хэмжээнүүдийг улс орон даяар зохион байгуулдаг.

Энэ жил үйлдвэрлэлийн орчин нөхцөлийг сайжруулах, ажилтныг ажлын байран дахь осол, мэргэжлээс шалтгаалсан өвчлөл болон бусад эрсдэлт хүчин зүйлийн нөлөөллөөс хамгаалах, урьдчилан сэргийлэх, ажлын байрны соёлыг төлөвшүүлэхэд төрийн болон төрийн бус байгууллагуудыг татан оролцуулах тэдний сайн туршлагыг олон нийтэд түгээн дэлгэрүүлэх ажлыг эрүүл аюулгүй ажил-бидний суурь эрх уриан дор тэмдэглэж байна.

Энэ хүрээнд дүүргийн хөдөлмөрийн аюулгүй байдал, эрүүл ахуйн зөвлөлийн гишүүдэд Хөдөлмөрийн аюулгүй байдал, эрүүл ахуйн тухай хууль тогтоомж, холбогдох дүрэм журмын хэрэгжилтийн талаар мэдлэг олгох, чадавхжуулах зорилготой анхдугаар зөвлөгөөнийг зохион байгууллаа.

Чингэлтэй дүүргийн Засаг даргын Тамгын газар, Хөдөлмөр халамж үйлчилгээний хэлтэс, Хөдөлмөрийн аюулгүй байдал, эрүүл ахуйн салбар зөвлөл, нийслэлийн Ажил олгогч эздийн холбоо, Улаанбаатар хотын Үйлдвэрчний эвлэлийн холбоо хамтран зохион байгуулж буй уг зөвлөгөөнд дүүргийн 1-24 дүгээр хороодын дэргэдэх “Хөдөлмөрийн аюулгүй байдал, эрүүл ахуйн салбар зөвлөл”-ийн гишүүд зэрэг нийт 120 хүн хамрагдлаа.

Зөвлөгөөнийг дүүргийн Засаг даргын Тамгын газрын Хяналт шинжилгээ, үнэлгээний хэлтсийн дарга Н.Наранзул нээж, ХАБЭА-н салбар зөвлөлийн дарга болон холбогдох мэргэжилтнүүд илтгэл, хэлэлцүүлгийг гишүүдийн дунд өрнүүллээ.

Дэлхий нийтээрээ дөрөвдүгээр сарын 30-ны өдрийг “Хүүхдийг зодож шийтгэхийн эсрэг өдөр” болгон тэмдэглэдэг билээ.

Энэхүү өдрийг угтан Чингэлтэй дүүргийн төрийн өмчийн цэцэрлэгүүдийн багш, сурган хүмүүжүүлэгч нарын дунд хүүхэд хүмүүжүүлэх эерэг аргыг сурталчлан таниулах, багш нарын судалгаа шинжилгээ хийхийг дэмжих, хүүхэд хамгаалал, ёс зүйн асуудлуудад судалгаатай шийдлийг санал болгох, хэрэгжүүлэх зорилгоор “Шийтгэл бол шийдэл биш” эрдэм шинжилгээнийг зарласан юм.

Багш, сурган хүмүүжүүлэгч нарын илтгэлийг хэлэлцэх эрдэм шинжилгээний хурлыг өнөөдөр Чингэлтэй дүүргийн Тамгын газарт зохион байгууллаа.

Өнөөдрийн эрдэм шинжилгээний хурлаар цэцэрлэгийн таван бүсээс шалгарсан эхний 10 илтгэлийг сонслоо. Энэхүү 10 илтгэлийг хэлэлцэн Хүүхдийг зодож шийтгэхийн эсрэг өдөр буюу дөрөвдүгээр сарын 30-ны өдөр шилдэг таван илтгэлийг шалгаруулах юм.

Улаанбаатар хотод тулгамдаж буй асуудлыг шийдвэрлэх хөгжлийн томоохон бүтээн байгуулалтад гадаад, дотоодын хөрөнгө оруулагчдыг татан оролцуулах, төр, хувийн хэвшлийн түншлэлийг өргөжүүлэх зорилгоор нийслэлийн Засаг даргын Тамгын газар, Улаанбаатар хотын Худалдааны танхим хамтран “Шинэ сэргэлт-Улаанбаатар” уриан дор “Улаанбаатар-Олон улсын хөрөнгө оруулалт, түншлэлийн форум” зохион байгуулагдсан.

Тус форумын үеэр Чингэлтэй дүүргийн Засаг дарга Н.Батсүмбэрэл дүүргийн 14, 18 дугаар хороодод хэрэгжих Гэр хорооллын дахин төлөвлөлтийн загвар төслийн талаар танилцуулсан юм. Гэр хорооллын дахин төлөвлөлтийн энэхүү төсөл 214 га талбайд хийгдэхээр төлөвлөгджээ.

Газрын онцлогоос шалтгаалан нам түвшний газарт өндөр барилга байгууламж, өндөрлөг газарт нам эко барилга байхаар төлөвлөсөн. Төсөл хэрэгжих 214 га талбайд одоогоор 4600 гаруй айл өрх амьдарч байна. Төлөвлөлтөд тусгагдсан орон сууцанд 4700 өрх амьдрах, нийт талбайн 97.2 га буюу нийт талбайн 40 гаруй хувьд ногоон байгууламж байх юм.

Мөн тус хэсэг нь бие даасан инженерийн байгууламж буюу Сэлбэ дэд төвийг түшиглэн хийгдэнэ. Төсөл хэрэгжих байршил нь төв зам дагуу, нийтийн тээврийн зогсоолд ойр, нийгмийн дэд бүтцийн хүртээмж сайн, зам дагуу худалдаа, үйлчилгээг дагасан хүн амын эрчим өндөр зэрэг олон давуу талтай. Дулаанаас бусад инженерийн шугам сүлжээнд холбогдох боломжтой бөгөөд “Тэрбум мод” үндэсний хөтөлбөртэй уялдаж буйгаараа онцлог. Энэхүү төсөл нь Улаанбаатар хотын хойд бүсийн гэр хорооллын дахин төлөвлөлтийг шийдэх чухал ач холбогдолтой.

Энэ хэсэгт нийт 168 мянга орчим оршин суугчдын төвлөрөл бий. Энэ нь цаашлаад Улаанбаатар хотын хөрсний бохирдол, түгжрэлийг бууруулах, төвлөрлийг сааруулах, олон төвт хотыг бий болгох чухал ач холбогдолтойг Чингэлтэй дүүргийн Засаг дарга Н.Батсүмбэрэл онцолсон юм.

 Чингэлтэй дүүргийн Дотоод аудитын алба нь Сангийн сайдын баталсан СХШХ/02 дугаартай хяналт шалгалтын удирдамжийн хүрээнд Чингэлтэй дүүргийн нийгмийн даатгалын хэлтэст хяналт шалгалтын ажлыг хийж байна.