Чингэлтэй дүүргийн Засаг даргын 2024 оны А/93 дугаар захирамжаар Гадна зар сурталчилгаа байрлуулахад дагаж мөрдөх журмын хэрэгжилтэд хяналт, шалгалт хийх ажлын хэсэг байгуулагдлаа.

Улаанбаатар хотын Ерөнхий менежерийн 2024 оны А/56 дугаар тушаалын хэрэгжилтийг ханган Дүүргийн Засаг даргын 2024 оны А/93 дугаар захирамжаар Дүүргийн хэмжээнд Нийслэлийн нутаг дэвсгэрт гадна зар сурталчилгаа байрлуулахад дагаж мөрдөх журмын хэрэгжилтэд хяналт тавих, зөрчлийг арилгах, цаашид авах арга хэмжээний санал боловсруулах үүрэг бүхий хэсэг байгуулагдсан.

Тус ажлын хэсэг нь дүүргийн 1-24 дүгээр хорооны нутаг дэвсгэрт нийтийн эзэмшлийн болон хувийн эзэмшлийн талбайд байрлуулсан гадна зар сурталчилгааны байгууламжийн зөвшөөрөл олголт, гэрээ байгуулсан байдал, ашиглалт, өнгө үзэмж, аюулгүй байдлын талаар тавигдах шаардлагад нийцэж буй эсэхэд, шалгалт хийж зөрчил арилгах, замын хөдөлгөөний хяналтын камер, гэрлэн дохио, тэмдэг тэмдэглэгээ хаасан, авто зам, явган замын хөдөлгөөнд саад учруулж буй гадна зар сурталчилгааны байгууламжийн судалгаа гаргах, зөрчил арилгах, Монгол улсын хэлний бодлогын үндэсний зөвлөлөөс батлуулсан MNS 5283:2022 стандартыг нэвтрүүлж, хаяг, хаягийн байгууламжийн жижиг гудамжнуудыг бий болгох, гадна зар сурталчилгаа байрлуулахыг хориглосон, гудамж зам талбайд байрлуулсан байгууламжийг, албадан буулгах, хариуцлагыг нэмэгдүүлэх, илэрсэн зөрчил дутагдлыг арилгуулах арга хэмжээ авах юм.

Нийслэлийн Чингэлтэй дүүргийн Засаг дарга Н.Батсүмбэрэл, БНСУ-ын “Green” эмнэлэгтэй 2024 оны 02 дугаар сарын 05-ны өдөр хамтран ажиллах санамж бичиг байгуулж, дүүргийн 1-24 дүгээр хороодын хүүхэд багачуудыг эрүүл мэндийн урьдчилан сэргийлэх үзлэгт хамруулахаар тохиролцсон.

Энэхүү санамж бичгийн хүрээнд Бүгд найрамдах Солонгос улсын “Green” эмнэлгийн эмч  мэргэжилтнүүд Чингэлтэй дүүргийн 12 дугаар хорооны “Шэжид Дүг” өрхийн эрүүл мэндийн төвд дүүргийн хүүхэд багачуудад энэ сарын 13-17-ны өдрүүдэд эрүүл мэндийн урьдчилан сэргийлэх үзлэг, эмчилгээ, оношилгоо хийж ажиллах юм.Засаг дарга Н.Батсүмбэрэл “Green” эмнэлгийн эмч, мэргэжилтнүүдэд талархал илэрхийлж цаашид хамтын ажиллагаагаа улам өргөжүүлж, өрхийн эрүүл мэндийн төвийн эмч, сувилагч нарыг мэргэшүүлэх, туршлага судлуулж ажиллах хүсэлтэй байгаагаа нээлтийн үеэр илэрхийллээ.

БНСУ-ын “Green” эмнэлэг өнгөрсөн онд дүүргийн 1720 хүүхдэд эрүүл мэндийн урьдчилан сэргийлэх үзлэг хийсэн бөгөөд энэ жил 1850 хүүхдэд урьдчилан сэргийлэх үзлэг, эмчилгээ оношилгоо хийхээр ажиллаж байна.

Чингэлтэй дүүргийн өрхийн эмнэлгүүдийн яаралтай тусламжийн бэлэн байдлыг сайжруулах, ур чадварыг дээшлүүлэх, эмнэлгийн мэргэжилтний нэр хүндийг өргөх, тэдний ажлыг олон нийтэд сурталчлан таниулах хүрээнд зохион байгуулагддаг “Дуудлага” тэмцээн амжилттай болж өндөрлөлөө.

Тэмцээний шагнал гардуулах үйл ажиллагаанд дүүргийн Засаг дарга Н.Батсүмбэрэл, Засаг даргын Тамгын газрын дарга Ж.Лхагвасүрэн, дүүргийн эрүүл мэндийн төвийн дарга Ж.Сувд болон холбогдох албаны хүмүүс оролцлоо.

“Чингэлтэй дүүргийн хувьд 144,249 хүн амтай. Дүүргийн иргэдэд 16 өрхийн эрүүл мэндийн төвийн  эмч, эмнэлгийн мэргэжилтэн эмнэлгийн анхан шатны цогц тусламж үйлчилгээг үзүүлэн ажилладаг. Цаашид энэхүү тэмцээнийг уламжлал болгон зохион байгуулж ажиллана” гэдгээ дүүргийн Засаг дарга Н.Батсүмбэрэл эмч, эмнэлгийн мэргэжилтнүүдэд хэллээ.

Тэмцээнд дүүргийн өрхийн эрүүл мэндийн 12 багийн 120 гаруй эмч эмнэлгийн мэргэжилтэн оролцож өртөө хэлбэрээр даалгавар гүйцэтгэж мэдлэг ур чадвараа сорин өрсөлдсөнөөс:

Нэгдүгээр байранд: Чингэлтэй дүүргийн 16 дугаар хорооны “Тэгш өлзий” өрхийн эрүүл мэндийн төвийн баг.

Хоёрдугаар байранд: дүүргийн 12 дугаар хорооны “Шэжид түг” өрхийн эрүүл мэндийн төвийн баг.

Гуравдугаар байранд: Дүүргийн 11 дүгээр хорооны “Цэнгэлжаргал хайрхан” өрхийн эрүүл мэндийн төвийн баг тус тус шалгарлаа.

Улаанбаатар хотын ерөнхий менежерийн 2024 оны 05 дугаар сарын 02-ны өдрийн "БҮХ НИЙТИЙН ИХ ЦЭВЭРЛЭГЭЭ" зохион байгуулах тухай нэгдсэн удирдамжийн хүрээнд Чингэлтэй дүүргийн хэмжээнд их цэвэрлэгээ явагдаж байна. 

Дүүргийн хэмжээнд хог тээвэрлэлт, ил задгай хог хаягдалгүй байлгах нөхцөлийг бүрдүүлэх, байгууллагын хана, фасад, цонх, хаяг, хаягийн байгууламжийг угааж цэвэрлэх, иргэдийг ая тухтай таатай орчинд амьдрах нөхцөлийг бүрдүүлэх зорилгоор албан байгууллага ойр орчмын 50м хүртэлх зам талбайн угаалга хийх, хог хаягдал, ногоон байгууламжийн усалгаа, цэвэрлэгээ үйлчилгээг хийж байна.

 Мөн дүүргийн Засаг даргын дэргэдэх хэлтэс алба, 1-24 дүгээр хорооны ажлын алба, Сууц өмчлөгчдийн холбоо, аж ахуйн нэгж байгууллагууд, иргэд, хог тээвэрлэгч байгууллагууд оролцон бүх нийтийн их цэвэрлэгээний ажил үргэлжилж байна.

Цахим шилжилтэд нийслэлийн 9 дүүрэг, 21 аймгийн төрийн албан хаагчдын оролцоо, хамтын ажиллагааг нэгтгэх, тулгарч буй асуудал, санал шүүмжийг сонсох “Шилэн төр, төрийн хурдан үйлчилгээ” зөвлөгөөнийг зохион байгуулж байна.

Өнөөдөр Цахим хөгжил, харилцаа холбооны яамнаас зохион байгуулж буй тус зөвлөгөөнд өнөөдөр Чингэлтэй, Сүхбаатар дүүргийн төрийн албан хаагчид, цагдаагийн болон онцгой байдлын албаны бие бүрэлдэхүүн оролцлоо.

Тус зөвлөгөөнд Цахим хөгжил, харилцаа холбооны сайд Н.Учрал,  Чингэлтэй дүүргийн Засаг дарга Н.Батсүмбэрэл болон холбогдох албаныхан оролцлоо.

Цахим шилжилтийн бодит үр дүн иргэдийн аж амьдралыг хөнгөвчилж, оновчлох, хүнд суртал, авилгаас ангид болгосноор илэрнэ. Үүнд төрийн албан хаагч нэг бүрийн оролцоо манлайлал чухал.

Технологийн тусламжтайгаар шинэ тутам үүсэж буй боломж бүрийг иргэдэд танилцуулах, иргэд олон нийтийг цахимд хэвшүүлэх, аливаа асуудлыг цахимаар шийдэх, ил тод, хүнд сурталгүй үйлчлэхэд эхлээд төрийн албан хаагчийн ур чадварыг дэмжих хэрэгтэй гэдгийг уулзалтын үеэр салбарын сайд онцоллоо.

Чингэлтэй дүүргийн жижиг дунд үйлдвэрлэлийг хөгжүүлэх, бизнесийн таатай орчин бүрдүүлэх, дүүргийн бизнес эрхлэгчдийн үйлдвэрлэсэн бараа, бүтээгдэхүүнийг гадаад, дотоодын зах зээлд гаргах хамтран ажиллах санамж бичигт Чингэлтэй дүүргийн Засаг дарга Н.Батсүмбэрэл, МҮХАҮТ-ын гүйцэтгэх захирал Т.Дүүрэн нар гарын үсэг зурлаа.

Түүнчлэн энэхүү санамж бичгийн хүрээнд дүүргийн залуучуудад МҮХАҮТ-аас хэрэгжүүлж буй Бизнесийн Сэргэлт Үндэсний Хөтөлбөрийн хүрээнд 10 000 залуусын бизнесийн мэдлэгийг тэлэх, тэдэнд бизнесийн салбарт системтэй үйл ажиллагаа явуулахад дэмжлэг үзүүлэх зорилготой Personal MBA (P-MBA) сургалтад хамруулж хамтран ажиллах юм.

Нийслэлийн гэр хорооллын гудамж, зам талбайд нийтийн тээврийн хүртээмж, үйлчилгээг сайжруулах, явган зорчигчдын аюулгүй байдлыг хангах зорилгоор нийслэлийн Засаг даргын тамгын газар, Азийн хөгжлийн банк хамтран “Гэр хорооллын нийтийн тээврийн үйлчилгээг сайжруулах” төслийг 2019 оноос хэрэгжүүлж байна.

Төслийн хүрээнд Чингэлтэй дүүргийн 17, 18, 23 дугаар хорооны нутаг дэвсгэрт хоёр битүү, 19 задгай шинэ автобусны зогсоолыг ашиглалтад орууллаа. Автобусны буудал тус бүр нийтийн тээврийн мэдээлэл авах ухаалаг самбартай бөгөөд тухайн замд үйлчилдэг нийтийн тээврийн чиглэлийн автобусны ирэх хугацааг харах боломжтой. Мөн автобусны буудал бүрд байршуулсан хяналтын камер нь буудал орчмын аюулгүй байдлыг хянах боломжтой гэдгийг албаны хүмүүс онцоллоо.

Хөдөлмөрийн тухай хуулийн 16.1.6 дахь заалт, Хөдөлмөр нийгмийн түншлэлийн гурван талт үндэсний хорооны 2022 оны 5 дугаар тогтоолоор батлагдсан “Сум, дүүргийн хөдөлмөрийн эрхийн маргаан зохицуулах гурван талт хорооны дүрэм”-ийн 2.6 дахь хэсэгт заасны дагуу Чингэлтэй дүүргийн Хөдөлмөрийн эрхийн маргаан зохицуулах гурван талт хороо байгуулагдсан.

Дүүргийн Хөдөлмөрийн эрхийн маргаан зохицуулах гурван талт хороо өнөөдөр ээлжит хурлаа хуралдуулж, нийт 3 иргэний асуудлыг хэлэлцэн холбогдох шийдвэрийг гаргалаа.

Хөдөлмөрийн эрхийн маргаан зохицуулах гурван талт хороо нь Хөдөлмөрийн маргаанаас урьдчилан сэргийлэх, шүүхийн өмнөх шатанд эвлэрүүлэн зуучлах үүрэгтэй юм.

Монгол Улсын Их Хурлын 2024 оны 01 дүгээр сарын 17-ны өдрийн нэгдсэн хуралдаанаар баталсан Хүүхэд хамгааллын тухай хуулийн шинэчилсэн найруулга, нэмэлт өөрчлөлт ирэх 09 дүгээр сарын 01-ний өдрөөс хэрэгжиж эхлэх юм. Үүнтэй холбогдуулан Чингэлтэй дүүргийн төрийн албан хаагчид болон хүүхэд, гэр бүлийн өмнө үүрэг хүлээгчдэд хуулийг таниулах зорилгоор Засгийн газрын хэрэгжүүлэгч агентлаг Хүүхэд, гэр бүлийн хөгжил, хамгааллын ерөнхий газар, Чингэлтэй дүүргийн Засаг даргын Тамгын газартай хамтран хууль сурталчлах арга хэмжээг зохион байгууллаа.

Тус арга хэмжээнд УИХ-ын гишүүн М.Оюунчимэг, Хүүхдийн эрхийн хэрэгжилтийн газрын дарга Г.Мөнхнасан, Чингэлтэй дүүргийн Засаг даргын орлогч З.Бямбажав болон бусад албаны нийт 200 гаруй албан хаагчид оролцлоо.

Хуулийн шинэчилсэн найруулгаар хуулийн үйлчлэх хүрээг илүү өргөжүүлж, хүүхэд хамгаалалд оролцогч талуудын үүрэг хариуцлагыг тодорхой болгосноос гадна сум хороодод Хүүхэд, гэр бүлийн нийгмийн ажилтан хэмээх орон тоог нэмэгдүүлж ажиллахаар хуульчлаад байгаа юм.

Хөдөлмөр нийгмийн хамгааллын яам, Азийн хөгжлийн банк, Монголын улаан загалмайн нийгэмлэг хамтран “Цар тахлын үед хариу арга хэмжээ авах нийгмийн хамгааллын төсөл 2”-ын хүрээнд хэрэгжүүлж буй “Төгсөлтийн аргачлалын туршилтын хөтөлбөр”-ийн явцын хяналтын уулзалт зохион байгуулагдлаа.

Өнөөдрийн уулзалтад дүүргийн Засаг даргын Тамгын газрын дарга Ж.Лхагвасүрэн, Хөдөлмөр, Нийгмийн хамгааллын яамны Шинжээч Д.Гэрэлтуяа, Азийн хөгжлийн банкны Монгол дахь Төлөөлөгчийн газраас Л.Итгэл, Азийн хөгжлийн банкны төв салбарын Олон улсын зөвлөх Палак Равал, Төсөл хэрэгжүүлэгч нэгжээс Хөтөлбөрийн зохицуулагч Б.Болормаа, Монголын Улаан загалмай нийгэмлэгийн төлөөлөл, төслийг хэрэгжүүлэгч Ажлын хэсгийн бүрэлдэхүүн оролцлоо.

Чингэлтэй дүүргээс уг хөтөлбөрт 207 өрх хамрагдаж байгаа бөгөөд өрх бүрийн сонгосон бизнест тохируулан тус бүр 1.5 сая төгрөгийн үнэ бүхий тоног төхөөрөмж, багаж хэрэгслийн дэмжлэг олгосон юм.

Үүнээс 205 өрх бизнесээ сонгон тоног төхөөрөмжөө авч, 2 өрх нь бизнесээ сонгоогүй ч төсөлдөө идэвхтэй хамрагдаж өрхийн бизнесээ эхлүүлж, төслийн үр шимээ хүртээд байна.

Туршилтын хөтөлбөрийн хэрэгжилтийн явцын талаар дүүргийн Хөдөлмөр, халамжийн үйлчилгээний хэлтэс төсөл хэрэгжүүлэгч нэгжид танилцуулж, дүүргийн ажлын хэсгийн гишүүд туршилтын хөтөлбөрт хамрагдаж буй зорилтот өрхүүдийг шаардлагатай нийгмийн үйлчилгээнд хамруулах, өрхийн үйлдвэрлэл, бичил бизнес, нийгмийн оролцоог дэмжих талаар авч хэрэгжүүлсэн арга хэмжээ, тулгамдаж буй асуудал болон цаашид төлөвлөж байгаа ажлын талаар мэдээлэл өгч, санал солилцлоо.

Азийн хөгжлийн банкны төв салбарын Олон улсын зөвлөх Палак Равал, туршилтын хөтөлбөрийн хугацаанд болон цаашид хэрэгжилтийн болон бодлогын түвшинд хариуцсан байгууллага бүр өөрсдийн чиг үүргийн хүрээнд үйл ажиллагаагаа хэрхэн уялдуулах, өрхөд тулгамдаж байгаа асуудлыг хэрхэн шийдвэрлэх талаарх санал, арга хэмжээг тусгасан төлөвлөгөө гаргаж ажиллах чиглэлийг ажлын хэсгийн гишүүдэд өглөө.

Иргэдийн аюулгүй, ая тухтай амьдрах орчныг бүрдүүлэх, гэмт хэрэг зөрчлөөс урьдчилан сэргийлэх, гэмт хэргийн гаралтыг бууруулах Чингэлтэй дүүргийн Нийтлэг үйлчилгээний газар камерын нэгдсэн төвийг байгуулж байсан. Анх тус камерын хяналтын төвд дүүргийн 1-3 дугаар хороог бүрэн камерын хяналтад оруулж байсан бол одоо дүүргийн 21 хороо бүрэн камержсан байна.

Уг төвийн үйл ажиллагааг нийслэл хотод жишиг болгон, үйл ажиллагаа болон гэмт хэрэг зөрчлийг хэрхэн илрүүлж байгаа сайн жишиг ажилтай өнөөдөр Цагдаагийн газрын удирдлагуудад танилцлаа.

Цагдаагийн ерөнхий газрын дарга, дотоодын цэргийн командлагч, генерал Т.Сүхболд болон дүүргийн Цагдаагийн газрын удирдлагуудад Засаг дарга Н.Батсүмбэрэл “Камерын хяналтын нэгдсэн төв”-ийн үйл ажиллагааг танилцууллаа.

Тус бүсийг байгуулахад дүүргийн 1 дүгээр хороог ногоон бүс болгон 61 цэгт 145 чиглэлийн камерын суурилж, ингэснээр гэмт хэрэг зөрчлийн дуудлага мэдээлэл өмнөх үеэс 48.6 хувиар буурч байсан. Одоо “Ногоон бүс” төслийн хамрах хүрээг нэмэгдүүлэн дүүргийн 21 хороог бүрэн камержуулж бүрэн ашиглалтад оруулжээ.

Мөн төслийн хүрээнд телехяналтын нэгдсэн төвөөс гадна дүүргийн цагдаагийн газрын дарга, хороодын хэсгийн байцаагч нар ажлын өрөөнөөс өөрийн хариуцсан нутаг дэвсгэрийн камерыг бүрэн хянаж үйл ажиллагаандаа ашиглах боломжтой юм.

“Камерын нэгдсэн төв, “Ногоон бүс”-ийг байгуулснаар зөвхөн гэмт хэрэг, зөрчил, болзошгүй эрсдэлээс урьдчилан сэргийлж, хамгаалаад зогсохгүй иргэдийг эрүүл, цэвэр орчинд амьдрах, амьдралын зөв дадал хэвшилтэй байхад туслах олон талын ач холбогдолтой” хэмээн Засаг дарга Н.Батсүмбэрэл онцоллоо.

Чингэлтэй дүүргийн хугацаат цэргийн албаны 2024 оны нэгдүгээр ээлжийн цэрэг татлага ерөнхий боловсролын V сургууль дээр өнөөдөр эхэллээ.

Цэргийн насны залуус, тэдний ар гэр, эцэг эхийн төлөөлөлд Монгол Улсын батлан хамгаалах үйл ажиллагааг сурталчлах, эх орноороо бахархах үзлийг нэмэгдүүлэх зорилгоор зохион байгуулсан цэрэг татлагын нээлтийн ажиллагаа боллоо.

Нээлтийн ажиллагаанд дүүргийн Иргэдийн Төлөөлөгчдийн Хурлын дарга Б.Мөнхбат, Засаг дарга Н.Батсүмбэрэл болон дүүргийн цэрэг татлагын товчооны бие бүрэлдэхүүн, цэргийн албанд татагдах зарлан муудах мэдэгдэл хуудас авсан залуус, тэдний ар гэр иргэд оролцлоо.

Нээлтийн ажиллагаанд Цэргийн дуу бүжгийн эрдмийн чуулгын уран бүтээлчид, “Тусгай салаа” киноны жүжигчин Б.Эрдэнэбаяр, Fire хамтлага, Увертюра хамтлагийн уран бүтээлчид оролцож ая дуугаа өргөлөө.

Хугацаат цэргийн албанд татагдах залуус:

- Иргэний үнэмлэх,

- Цэргийн үүрэгтний үнэмлэх,

- Мэргэжил эзэмшсэн бол мэргэжлийн үнэмлэх,

- Сургууль төгссөн бол диплом, Цээж зураг зэргийг биедээ авч,

- Цэрэг татлагын байранд тогтоосон хугацаанд ирэх үүрэгтэй юм.

ЦЭРГИЙН НАСНЫ НИЙТ ЗАЛУУС ЦЭРЭГ ТАТЛАГАД ИДЭВХТЭЙ ХАМРАГДАНА УУ.