Чингэлтэй дүүргийн удирдах ажилтны шуурхай хуралдаан өнөөдөр боллоо.  Шуурхай хуралдааныг Чингэлтэй дүүргийн Засаг даргын Тамгын газрын дарга Ж.Лхагвасүрэн удирдан явууллаа.

Өнөөдрийн хуралдаанд дүүргийн Хөдөлмөр халамж үйлчилгээний хэлтэс,  Нийгмийн даатгалын хэлтэс, Боловсролын хэлтсийн удирдлагууд мэдээлэл хийлээ.

Дүүргийн Засаг даргын Тамгын газрын дарга Ж.Лхагвасүрэн удирдах ажилтнуудад үүрэг даалгавар өглөө. Цаг агаар дулаарч буйтай холбоотой халиа тошин үүсэх, нэмэгдэх, шар усны үер болох эрсдэлтэй учраас дүүргийн гамшгаас хамгаалах алба, мэргэжлийн ангийн бэлтгэл, бэлэн байдлыг хангахыг даалгав.

Мөн иргэдийн аюулгүй байдлыг хангах орчин нөхцлийг бүрдүүлэх, хог цэвэрлэгээ, ариутгалын ажилд анхаарах, иргэдээс ирсэн өргөдөл гомдлын шийдвэрлэлийг цаг тухай бүрт нь шийдвэрлэх, иргэдийн санал хүсэлтийг сонсож ажиллахыг даалгалаа.

Хаврын дулаан улирал ирж буйтай холбоотой гудамж талбайд хүүхдүүд гадаа тоглох, дугуй, скүүтэр унах зэрэг хөдөлгөөний эрчим ихсэж байгаа учир хүүхдийг зам тээврийн ослоос урьдчилан сэргийлэх чиглэлээр ажиллахыг үүрэг болголоо.

Чингэлтэй дүүргийн оёдлын салбарын үйлдвэр эрхлэгчдийн дунд “Уран үйлчин-2024” уралдаан өнөөдөр эхэлж, уралдаанд оролцож буй жижиг, дунд бизнес эрхлэгчдэд “Оёмол бүтээгдэхүүний оёдолчны онолын мэдлэг олгох, бататгах” сургалтыг явууллаа.  

Оёдлын чанар стандартыг боловсронгуй болгох, мэдлэг чадварыг дээшлүүлэх, туршлагатай үйлдвэрлэгчдийн мэргэжлийн ур чадварыг сурталчлан таниулах, салбар дундын уялдаа холбоог сайжруулан үйлдвэрлэгчдийн хамтын ажиллагааг өргөжүүлэх зорилготой тус уралдааныг дүүргийн Засаг даргын Тамгын газар, Жижиг, дунд үйлдвэрийг дэмжих төв, “Оёдлын салбарын нэгдсэн мэргэжлийн холбоо” ТББ-тай хамтран  зохион байгуулж байна.

Уралдаанд оролцож буй оёдлын салбарын үйлдвэр эрхлэгчдийг бодлогоор дэмжиж ажиллаж, хамтын ажиллагаатай 4-5 улс руу жижиг, дунд бизнес эрхлэгчдийг туршлага судлуулах, бараа бүтээгдэхүүнээ борлуулах нөхцөл байдлаар хангаж ажиллахаа дүүргийн Засаг дарга Н.Батсүмбэрэл хэллээ.

Тус уралдаанд оёдлын салбарын 120 гаруй үйлдвэр эрхлэгчдэд оролцож ур чадвараа сорин өрсөлдөж байна. “Уран үйлчин-2024” уралдаан хоёр үе шаттай явагдана.

Онолын болон ур чадварын төрлөөр үндэсний хувцас, европ хувцас, хөдөлмөр хамгааллын хувцас гэсэн гурван төрлөөр зохион байгуулагдаж, болзол хангасан үйлдвэр эрхлэгчид “ОСНМХолбоо” ТББ-аас “Мастер оёдолчин” цол олгох юм.

Чингэлтэй дүүргийн 24-р хороо Арсогоот хэсэгт халиа дошин үүсч, зорчих хэсэгт ус хуралдаж хүндрэлтэй нөхцөл байдал үүссэнийг дүүргийн "Тохижилт үйлчилгээ" ХК техникээр түрж, шуурхай арга хэмжээ авлаа. 

Чингэлтэй дүүргийн 19 дүгээр хороо, Доод салхитын 1,4 дүгээр гудамж 3б, 216, 217 тоот хашаа гэрт ус орлоо гэх дуудлага дүүргийн Онцгой байдлын хэлтэст ирсний дагуу тус хэлтсийн орлогч, хошууч Б.Амандыхаар ахлуулсан бэлтгэл ээлжийн 7 алба хаагч газар дээр нь ажиллалаа.

Тус газарт помп ашиглан шар усыг соруулж, "Тохижилт үйлчилгээ" ХХК-ийн 2 албан хаагч, 1 экскаватораар далан сэтлэн айлууд руу орсон усыг гаргаж, яаралтай арга хэмжээ авлаа.

Ахмадын аварга шалгаруулах волейболын тэмцээн амжилттай зохион байгуулагдаж, дүүргийн 18 хорооны 300 тамирчид оролцож, аваргууд шалгарлаа.

Эрэгтэй баг:

1-р байр: Л.Нэргүй ахлагчтай 23 дугаар хороо

2-р байр: Б.Бямбаа ахлагчтай 16 дугаар хороо

3-р байр: Ж.Батсуурь ахлагчтай 1 дүгээр хороо

Эмэгтэй баг:

1-р байр: П.Наранчимэг ахлагчтай 16 дугаар хороо

2-р байр: Ж.Урантогос ахлагчтай 24 дүгээр хороо

3-р байр: Ж.Алтанцэцэг ахлагчтай 18 дугаар хороо тус тус шалгарлаа.

Чингэлтэй дүүргийн Засаг даргын Тамгын газраас дүүргийн ахмадуудын дунд волейболын аварга шалгаруулах тэмцээнийг зохион байгуулж байна.

Дүүргийн Хайрхан хөгжлийн төв-2 спорт зааланд зохион байгуулагдаж байгаа тус тэмцээний нээлтэд дүүргийн Засаг даргын Тамгын газрын дарга Ж.Лхагвасүрэн, Ахмадын хорооны дарга П.Төвсанаа, Биеийн тамир, спортын хорооны дарга Б.Мөнхбаяр нар оролцлоо.

Өнөөдрийн тэмцээнд дүүргийн 18 хорооны 300 гаруй ахмадууд оролцож байна.

Чингэлтэй дүүргийн 293 дугаар цэцэрлэг олон улсын Монтессори арга зүйн “Амьдрах ухаан” хөтөлбөрийг хэрэгжүүлж байгаа бөгөөд сургалтын 306 хичээлийн хэрэглэгдэхүүний үзэсгэлэнг гаргаж, дүүргийн 11 цэцэрлэгийн 45 багш, 118 эцэг, эхчүүдийг хамруулж, туршлага солилцох үйл ажиллагааг зохион байгууллаа.

Нийслэлийн Чингэлтэй дүүргийн сургуулийн өмнөх насны хүүхдүүдийн “Уран хөдөлгөөнт гимнастик ”-ийн аварга шалгаруулах тэмцээн Биеийн тамир, спортын хорооны зааланд 2024 оны 03 дугаар сарын 28-ны өдөр амжилттай зохион байгуулагдаж, аваргууд шалгарлаа.

Тэмцээнд 10-н цэцэрлэгийн 300 гаруй хүүхэд оролцсоноос:

1-р байранд Д. Жимсээ эрхлэгчтэй 154 дүгээр цэцэрлэг

2-р байранд Ю.Соёлмаа эрхлэгчтэй 74 дүгээр цэцэрлэг

3-р байранд Э. Наранцэцэг эрхлэгчтэй 5 дугаар цэцэрлэг

Тусгай байранд С.Отгонбат эрхлэгчтэй 155 дугаар цэцэрлэг

Тусгай байранд Ж.Эрдэнэтуяа эрхлэгчтэй 70 дугаар цэцэрлэг тус тус байр эзэллээ.

Чингэлтэй дүүргийн Ерөнхий боловсролын 23 дугаар сургуулийн “Хос уянга” клубын сурагчдын “Эрдэм” монгол бичгийн үзэсгэлэн өнөөдөр Г.Занабазарын нэрэмжит Дүрслэх урлагийн музейд нээлтээ хийлээ.

Үзэсгэлэнгийн нээлтэд Чингэлтэй дүүргийн Засаг даргын Тамгын газрын дарга Ж.Лхагвасүрэн, Төрийн захиргааны удирдлагын хэлтсийн дарга Б.Нацагдорж, 23 дугаар сургуулийн захирал Ш.Оюунсүрэн болон багш, сурагчид оролцлоо.

23 дугаар сургуулийн “Хос уянга” клуб 14 жилийн өмнө анх байгуулагдаж байсан бөгөөд энэ хугацаанд 3 удаа уран бүтээлийн үзэсгэлэн гаргаж байсан юм. Анхны бүтээлийн үзэсгэлэн “Айсуй”, удаах нь “Тэмүүлэл” нэртэйгээр гаргаж байсан бол энэ удаагийн үзэсгэлэнг “Эрдэм” нэртэйгээр өргөн барьж байна.

Үзэсгэлэнд “Хос уянга” клубын 30 гаруй сурагчдын бүтээл, уран бичлэгийг толилуулж байна.

Үзэсгэлэн Г.Занабазарын нэрэмжит Дүрслэх урлагийн музейд энэ сарын 30-ны өдрийг дуустал үргэлжилнэ.  

Цэцэрлэгийн хүүхдүүдийн бие бялдрыг чийрэгжүүлэх, эрүүл мэндийг бэхжүүлэх, хөдөлгөөний эвсэл суулгах, сургуулийн өмнөх боловсролын орчин дахь бие бялдрын сургалт хүмүүжлийг сайжруулах зорилготой Чингэлтэй дүүргийн аварга шалгаруулах “Уран хөдөлгөөнт гимнастик-2024” тэмцээний нээлт боллоо.

Тэмцээний нээлтэд Чингэлтэй дүүргийн Засаг даргын Тамгын газрын дарга Ж.Лхагвасүрэн, Нийгмийн хөгжлийн хэлтсийн дарга Л.Баярмаа, Боловсролын хэлтсийн дарга А.Очир, дүүргийн Биеийн тамир, спортын хорооны дарга Б.Мөнхбаяр нар оролцож, баг тамирчдад амжилт хүслээ.

Энэхүү тэмцээн нь цэцэрлэгийн хүүхдүүдэд бие бялдрын болон гоо зүйн хүмүүжил олгох чухал ач холбогдолтой бөгөөд дүүргийн 10 цэцэрлэгийн 300 гаруй хүүхэд багачууд оролцож, авьяас чадвар, авхаалж самбаагаа сорин өрсөлдөж байна. 

Нийслэлийн Чингэлтэй дүүргийн Ерөнхий боловсролын сургуулийн "Сурагчдын хөгжөөн дэмжигчид"-ийн аварга шалгаруулах анхдугаар тэмцээнийг 3 насны ангиллаар зохион байгуулж, дүүргийн ерөнхий боловсролын 7 сургуулийн 120 тамирчид оролцож, аваргууд шалгарлаа.

Бага насны ангилалд:

1-р байр Б.Эрдэнэчимэг багштай 39 дүгээр сургууль

2-р байр Г.Сэргэлэнцэцэг багштай 37 дугаар сургууль

3-р байр Т.Ивээл багштай 139 дүгээр сургууль

Дунд насны ангилалд:

1-р байр Б.Эрдэнэчимэг багштай 39 дүгээр сургууль

2-р байр С.Амарзаяа багштай 24 дүгээр сургууль

3-р байр Г.Сэргэлэнцэцэг багштай 37 дугаар сургууль

Ахлах насны ангилалд:

1-р байр С.Амарзаяа багштай 24 дүгээр сургууль

2-р байр Э.Ариунбилэг багштай 61 дүгээр сургууль

3-р байр Н.Түвшинбаяр багштай 23 дугаар сургуулийн багууд тус тус эхний байруудад шалгарлаа.

Багийн нийлбэр нэгдсэн дүнгээр:

1-р байр Б.Нэргүй захиралтай Б.Эрдэнэчимэг багштай 39 дүгээр сургууль

2-р байр Т.Нарантуяа захиралтай 24 дүгээр сургууль

3-р байр З.Тунгалаг захиралтай 37 дугаар сургуулиуд шалгарсан юм.

Чингэлтэй дүүргийн Сургуулийн өмнөх боловсролын байгууллагын удирдах ажилтнуудын ээлжит шуурхай хуралдаан өнөөдөр боллоо.

Шуурхай хуралдааныг Чингэлтэй дүүргийн Засаг даргын Тамгын газрын дарга Ж.Лхагвасүрэн удирдан явуулж, цаг үеийн нөхцөл байдалтай холбоотой асуудлаар мэдээлэл хийж, санал солилцлоо.

Мөн Засаг даргын Тамгын газрын Архивын хэлтсээс албан бичгийн шийдвэрлэлтийн явц, зөрчлийн мэдээг танилцуулав.